[A:594]phebs dang / nor sogs sdud pa ni de'i tshe legs gso'i dngos po rnam sras kyi bang mdzod kha bye ba lta bu dang / nangs par ni chu stod tshes bzhi gangs nyi shar dus de dang / zhi ba'i las ni/ 'brel thogs kyis mtshon sems can thams cad kyi sdug bsngal zhi ba'i thugs bskyed de bzhin dang / dga' ston ni/ mdo sngags kyi gzhung du ma 'don pa dang lhan cig bsnyen bkur dang / skye bo rnams so so'i 'dod yon gyis tshims par mdzad mthar glu gar sogs rgya cher gnang ba dang / dgos pa ni/ bstan 'gro spyi bye brag gi chos srid yar 'gro'i rten 'brel tsam du ma zad/ rje rdo rje 'chang yab sras dpon brgyud dang bcas la 'brel thogs thams cad srid zhi'i rtse mor 'khrid pa sogs te/ skas 'go'i sgo nang du rje nyid khri'u shing la chos dung rin po che bsnams bzhin par bzhugs te/ yar 'gro tshang mar phyag dbang rdzogs nas/ rtser lha bsangs skabs bya rog snum bag can gsum 'ongs te dbus ma'i mchu yas mas mar gyis dkar por byas te/ gsum ga rje'i zhal dkyil la blta bzhin du skad snyan sgrogs par byed do/ /de dus zhal ngo byings rnams theg chen pho brang du bzhugs shing / bka' ram nas thig g.yab shar gyi byang du tshe chog /bsgrigs pa yan gyis de'i lhor 'dul lung sde bzhi/ 'bum sde lnga sogs gsung sgrogs/ btsun chung rin sgang rnams nas chos spyod/ byings rnams mkhar thog khud yangs su bsdad/ dga' ston gyi spro zas sogs stsal te rim gyis lha khang byang gi skas la btang / de nas theg chen pho brang du phyag nas dang / mdzod nag gtor spod/ phyi dro sde yangs su kong gzhas sogs legs lam dpag med mdzad pa de'i tshe lha chen steng gi rten grags che ba rnams dang / chos dung rin po che sogs la snyan shal 'dod gsol can re 'bul bar mdzad/ de'i sang dge tsha