[A:331]rnam thar kho na'i gsung ste/ dpyod ldan gzur gnas rnams kyis brtags tshe/ chos bcu pa'i mdo las/ du ba las ni mer shes dang / /chu skyar las ni chur dpog ltar/ /byang chub sems dpa' blo ldan gyi/ /rigs ni mtshan ma dag las shes/ zhes dang / 'jam mgon bla ma sa skya paNDi tas/ du bas me bzhin rnam thar la/ /nang gi yon tan legs brtags te/ /zhes sogs la brtags shing dpyad pas khengs bskyung gi gsung yin min blo ldan rnams kyis dgongs zab mchog tu bsti ba zhu/ smras pa/ ngag dbang kun la dga' ba'i blo gros gtam/ /sangs rgyas bstan pa'i rgyal mtshan rtser bsgrags pas/ /dpal ldan bzang por mnga' gsol mA li kaH /sras bcas rgyal bas shis brjod char du snyil/ /skyob kun thugs rje'i sgyu 'phrul mkha'i nor bu/ /skye dgu'i bsod nams shing rta'i 'khor lo yi/ /'dun khang yangs por bskyed 'di phan bde'i bstan/ /'dab stong dgod pa'i gnyen du yang yang brel/ /de lta'i gzugs sku'i ngo mtshar ri mo ni/ /gdul bya'i blo mtshor nor bu chu shel la/ /sna tshogs kha dog tshon gyi rten 'brel dbyibs/ /cir snang sgyu ma'i rol rtsed e ma mtshar/ /zhes kyang smras so// // ! gnyis pa de nyid gnas dang rigs rus cho 'brang phun sum tshogs par gzigs te phebs tshul la/ gnas phun sum tshogs pa dang / rigs rus cho 'brang phun sum tshogs pa dang ldan pa'i gdung rabs byon tshul/ gdung rabs rnams kyi nang nas skabs su bab pa gang nyid yum gyi lhums su zhugs te sku ji ltar bltams pa'i tshul dang gsum las/ dang po la/ gnas mchog 'di nyid dang zhar byung rje btsun gong ma lung bstan tshul dang / bod kyi rdo rje gdan dpal ldan sa skya 'di nyid bstan rtsis dang sbyar te btab tshul gnyis las/ dang po ni/ sngon gyi dus su dpal ldan sa skya 'di nyid ma 'ongs