[A:642]bcu drug /yul slob gnyis/ rtse gdong slob dbu ban tshang bcas byon nas/ mkhan chen gyis sku rten/ brgya dpon nas gsung rten/ las chen pas thugs rten dang phrin las rten/ phyag gnyer la yon tan rten gser bum re re/ ban tshang rim bzhin rol sil rnga/ chos dung rin po che/ rdor dril/ sna bdun/ rdzas brgyad/ bzhugs stan rdo rje rgya gram rnams phyag khyer gyis phebs gong tshogs pa byings bzhugs tshar ba mdzad/ 'jam mgon sku mched chos khrir bzhugs pa'i sku mdun yab rje rdo rje 'chang nyid bzhengs mthar/ g.yas g.yon la phyag khyer ba rnams bsgrigs nas/ dbu byed che bas bskul la/ sangs rgyas chos tshogs shur ma gsum nas bzung / khrus gsol/ sku phyis bar de dus kyi zin bris bzhin mdzad/ de nas sku rten yab kyi phyag tu bsnams te/ rgyal srid sna bdun gyi gdangs dang bcas pas/ tshogs gnyis mthar phyin mtshan mchog so gnyis dang / /rab mdzes dpe byad bzang po brgyad cus spras/ /sprul pa'i 'od zer dpag med 'phro ba can/ /longs spyod rdzogs sku chen por dbang bskur ro/ /oM badzra kA ya siddhi a bhiShinytsA mi/ gsung rten bsnams te/ nye ring kun la snyoms pa tshangs pa'i dbyangs/ /thar lam ston pa lha yi rnga bo che/ /skye med 'gag pa med pa brag cha'i gsung / /yan lag drug cu'i dbyangs kyis dbang bskur ro/ /oM badzra wAka siddhi a bhiShinytsA mi/ thugs rten bsnams te/ chos nyid dag pa gnyis ldan mngon du gyur/ /chos can ji snyed dbye ba so sor gzigs/ /chos rnams rnam kun mngon rdzogs byang chub pa'i/ /sgrib bral rnam dag thugs kyis dbang bskur ro/ /oM badzra tsItta siddhi a bhiShinytsA mi/ yon tan rten gser bum cha bsnams te/ stobs nyid rdo rje mi 'jigs sengge bzhin/ /ma 'dres mkha' dag thub bstan chu zla ltar/ /bral dang rnam par smin pa'i 'bras bu yi/ /