[A:667]gsung bskang rgyas pa sogs bstan 'gro'i mdzad sgo rnams zin nas chibs bsgyur gyi nyin bco brgyad du gnang sbyin byin rten sogs mang po dang kye rdor rnam bshad/ rab brtan ma'i zhal 'bag zho phye las sbrus pa'i gsol ba rnams gnang nas 'di gsum sku gsung thugs rten gyis slar 'dir nged rang thengs gcig sleb yong ngo / /zhes bka' stsal nas phebs te lhun grub rdzong mdun du bzhugs shing / rdzong rtser rgyal khams bde thabs la ched du dgongs pa'i lha bsangs bcas mdzad nas/ shar sum mdor bzhugs/ chag la'i rtser yang gong bzhin lha bsangs thog rje nyid la gzigs snang ngo mtshar can yang 'khrungs/ stag lung du grub rgyal tshe dbang zhig stsal nas gnas gzigs dang phun mdor bzhugs/ sang nyin ko bar 'thon byang ra sgreng dang nye bar gsang ye'i pho brang du thab bsu dang bcas/ ra sgreng du phebs te jo bo rjes rgya gar nas gdan drangs pa'i 'jam pa'i rdo rje'i sku drung du de'i sgrub mchod rgyas pa/ gnas ngo mtshar can de'i shug khrod nas phyi bskor la me char phab ste skye dgu de dag gi gtsug tu phyag gser gyi 'khor lo ngal bsos te bzhugs sgar du phebs/ de'i sang gsang ye'i pho brang du mkha' spyod ma'i sgrub mchod/ ra sgreng gi gnas tshang yin khul bcom mda' dang / ko bar 'thon a dkar sum mdo dang / 'bar tshag /nyi ma tshal/ ki ra thang rnams su bzhugs zhag re dang / gter sgrom chu tshan zhag lnga chab bdugs bcas phebs 'phral rnam 'joms dang / nyin ltar lha bsangs rgyas pa/ chab klu/ tshe chog rnams dang / snron zla'i tshes gcig la lha mo gsol mchod kyi gsung bskang yang der mdzad nas/ phebs lam 'bri gung mthil gnas gzigs dang grog sna zangs khar bzhugs/ de nas 'bri gung spro khang yang ri sgar du bzhugs/ de nas klong chen rab 'byams pa'i gdan sa zhwa lha khang du gza' dang dam can par gtor bsngo bcas mdzad