[A:347]dam pa mang du bsten cing zhal slob kyang kha shas byung / btsun mo yol gdong ma nor bu buu khrid la bstan 'dzin dbang / bsod nams 'phags pa/ bsod nams dbang rgyal gsum las phyi ma yab so gsum shing byar bltams nas re drug lcags stag la gshegs pa des gcen bgres pa dang / ngag dbang bstan pa'i rdo rje sogs bsten nas zhal slob kyang kha shas byung / btsun mo stag lung ma bkra shis tshe ring la kun dga' tshe dbang rig 'dzin dang / ngag dbang nor bu rgyal mtshan gnyis/ yang phal mo zhig las sras gcig ste gsum byon pa'i nor bu rgyal mtshan gyi btsun mor bya sgo ma tshe ring bu khrid bzhes mod/ yab sras lcam bcas de dag gi sku thog la bstan gegs kyis gdan sa 'thor ba nas bzung yun ring 'das shing / phyis su drin can rtsa ba'i bla ma dam pa dpal sa skya pa chen po sngags 'chang bla ma thams cad mkhyen pa ngag dbang kun dga' blo gros sangs rgyas bstan pa'i rgyal mtshan dpal bzang po zhes sku drin mtshungs pa ma mchis pa'i zhal snga nas de nyid dgung grangs bcu drug tu byon pa shing byi lor gdan sa chen po rtse gdong phyag 'byor byung ba ste/ phyis byon rtse gdong bla brang ba'i gdung rabs su grags pa rnams so/ /gong gi kun dga' bsam grub kyi gcung po sngags 'chang bdud kyi stobs 'phrog ngag dbang kun dga' rin chen bkra shis grags pa rgyal mtshan dpal bzang po nyid yab nyer drug pa me glang lor 'khrungs shing re brgyad pa shing sprer gshegs pa de'i dbu bla ni/ sa lo chen po ngor chen dkon mchog lhun grub/ 'phags chen dpal ldan bkra shis/ spyan snga ngag dbang chos grags/ ngor chen sangs rgyas seng ge /mkhan chen legs pa'i blo gros sogs bsnyen nas zhal slob ris med nor 'dzin gyi rdul dang mnyam pa bskrun par mdzad de/