[A:361]bar/ /gcig min yang yang rtse ba'i 'byung 'gyur gyi/ /phan bde'i nyi ma 'jig rten kun gsal ba'i/ /dkyil 'khor dbang phyogs sa 'dzin do ker rtser/ /nyes bral bstan 'gro'i dpal du e ma ho/ /zhes kyang smras so// // ! gsum pa 'khrungs ma thag nas dgung grangs bcu gcig yan sku gzhon nu'i dus kyi ngo mtshar mdzad pa'i cha rnams lo khams ma 'khrul bar go rim bzhin du ston pa la/ thog mar lo mgo 'dzin tshul yang lugs mang du 'byung ste/ rags tsam brjod na/ dpal dus kyi 'khor lo dang mdo sde gser 'od dam pa sogs nas yar ngo sngon 'gro'i nag zla lug khyim dang / mchims sogs 'dul 'dzin sngon ma rnams khrums zla'i tshes bcu drug nas dang / shAkya shrI sogs 'dul 'dzin kha cig tha skar zla ba'i tshes bcu drug nas dang / 'dul 'dzin phyi ma rnams smin drug zla ba'i tshes bcu drug nas dang / khyung dang phug lugs sogs nag rtsis pa dang 'jig rten yongs grags rnams mgo zla'i tshes gcig nas dang / bod rgyal po'i rjes su 'brangs pa rnams bde mchog rdo rje mkha' 'gro'i rgyud las/ dgun zla 'bring po nas brtsams te/ /nyi ma byang du bgrod pa'i dus/ /zla ba rnam pa bcu gnyis ni/ /rim ni rim pa bzhin du bzhag /ces gsungs pa dang bstun dgun zla 'bring po rgyal zla ba nas dang nag rtsis pa kha cig kyang de bzhin/ hor lugs dang nag rtsis pa kha cig gso dpyad pa rnams rta zla nas dang / mdo lugs pa kha cig dbo zla nas lo mgo 'dzin pa sogs rnam grangs mang yang / rang lugs bod rgyal po'i rjes su 'brangs te rgyal zla nas 'dzin pa'i dbang du zhus nas/ de ltar skye dgu'i bsod nams kyi bgo skal du rnyed pa'i dgos 'dod ma lus pa 'bad med du 'byung ba'i gzugs sku 'dod 'byung dbang gi rgyal po de nyid ni/ 'khrungs ma thag nas sku lta bas chog mi shes pa gzi brjid dang dpal mngon par 'bar zhing sku bskyed che ba/ rang bzhin bzang bas byis skad 'byin pa sogs