[A:375]gshis lugs la/ /byas shes drin gzo'i ri mo bsub tu bral/ /rgyal dang rgyal sras mchog gi rnam thar ni/ /lha rigs gzhon nu'i thugs kyi rgya mtshor 'khyil/ /zhes kyang smras so// // ! rtsa ba'i sa bcad bzhi pa khams gsum chos kyi rgyal po'i gser khri rin po cher dbang bskur te bstan pa dang 'gro ba'i phan bde rlabs po che spel tshul la/ khams gsum chos kyi rgyal po'i gser khri rin po cher mnga' gsol ba dang / bstan 'gro'i phan bde spel tshul rnams lo khams dang sbyar te bshad pa gnyis las/ dang po ni/ skye ba gzhan du sbyangs pa dang / /mkhas pa du ma bsten pa dang / /rnam par dpyod pa'i blo gros kyis/ /shes bya kun la 'jigs med thob/ /ces gsungs pa ltar/ nges pa'i don du rje btsun 'jam pa'i dbyangs las gud na ma mchis kyang / rnam par mi nas mir gyur ba'i skye ba nyi shu rtsa lngar de nyid kyis rjes su bzung bas shes bya rig pa'i gnas lnga dang / bcu dang bco brgyad la sogs pa mtha' dag phyin ci ma log par mkhyen pa'i 'jam mgon sa skya paNDi ta chen po kun dga' rgyal mtshan dpal bzang po sku dbon dang bcas pa'i chos kyi khri rin po che mkhas pa zil gnon du grags pa ga la bar/ lha dang bcas pa'i 'gro ba mtha' dag gi mchod sdong chen po khams gsum chos kyi rgyal por dbang bskur ba'i sngon du 'gro ba rten 'brel gyi sgo 'phar brgya phrag dbye rgyu'i sku rim du/ sa lug dbyug zla'i nyer drug la dmar chen gtor bzlog dang sbrags rgyal gsung bka' 'gyur rin po che zhal dbye ba/ mi shigs rdo rje'i tshe srog sgrub pa'i cho ga bcas dang / bsnyen sgrub las gsum mthar phyin gyi zor las pa lngas nyer dgur gtor zor 'phen pa/ smin zla'i tshes gsum lhag pa lha mtshams kyi 'grub sbyor dang ldan pa'i nyin mchod zhing bya khra ma'i 'bruu spungs la/