[A:381]mdzad pa'i tshul gnyis kyi dang po la/ spyir dam pa'i chos nyan pa'i phan yon dang / bye brag theg chen gyi chos nyan bshad kyi phan yon gnyis kyi dang po ni/ byang chub sems dpa'i sde snod las/ /thos pas chos rnams shes par 'gyur/ /thos pas sdig las ldog par 'gyur/ /thos pas don med spong bar 'gyur/ /thos pas mya ngan 'das pa thob/ /ces gsungs la/ de'i don rnam bshad rig par/ de la rkang pa bzhi po 'dis ni rim pa ltar/ phyi nang gi grub mtha' shes pas blang dor gyi gnas shes pa dang / tshul khrims kyi bslab pa thob nas nyes spyod las ldog pa dang / sems kyi bslab pa thob nas don med pa'i 'dod pa spong ba dang / shes rab kyi bslab pa thob nas de la brten te zag zad mngon du byas nas myang 'das thob pa ste bzhi'am/ yang dag pa'i lta ba rnyed pa dang / las dang / nyon mongs pa dang / skye ba'i kun nas nyon mongs las brgal ba ste bzhi dang / chos 'dul ba la dad pa rnyed pa dang / rab tu byung ba dang / dbang po'i sgo bsrungs pas 'dod pa las 'dod chags dang bral bas gnod pa spong ba dang / bden pa rtogs nas myang 'das thob pa ste bzhi la bshad do/ /lung rnam 'byed las/ mang du thos pa la phan yon lnga yod de/ phung po la mkhas pa dang / khams la mkhas pa dang / skye mched la mkhas pa dang / rten cing 'brel bar 'byung ba la mkhas pa dang / de'i gdams ngag dang rjes su bstan pa gzhan la rag ma las pa yin no/ /gzhan yang rnam bshad rig par bcom ldan 'das kyi chos nyan pa la phan yon lnga gsungs te/ ma thos pa thos par 'gyur ba dang / thos pa yongs su byang bar 'gyur ba dang / som nyi spong ba dang / lta ba drang por byed pa dang / shes rab kyi tshig dang don zab mo rtogs par 'gyur ba'o/ /zhes sogs mang du gsungs