[A:102]brtan/ dbon stod chos rje bsod nams seng ge sogs las kyang chos 'brel re tsam gsan pa yin no/ /rgya mtsho'i gting dang kun gsal gyi/ /mtha' bzhin khyod kyi yon tan ni/ /dpag nus min pa'i grags pa yis/ /srid zhi'i sgra gzhan zil gyis mnan/ /de tshe rnam thos bu'i 'byor par/ /'gran pa'i sde bzhi dge bcu yis/ /mngon par sgeg pa'i rgyal khab nas/ /mi bdag sa yi tshangs pa des/ /chos kyi dbang phyug spyan 'dren pa'i/ /pho nya'i tshogs rnams lhags pa dang / /lhan cig 'byon par bskul ba ni/ /dri za'i rgyud mangs lta bur snyan/ /tsha bas nyen par bsil yab dang / /'dod ldan tshogs la nor ji bzhin/ /rgyal dang rgyal ba'i sras po rnams/ /gzhan gyi don la shin tu dgyes/ /de slad ngal dang rang don ni/ /bzhi mdo'i rtswa bzhin khyad bsad nas/ /padma'i mtsho la ngang mo ltar/ /rgyal po'i pho brang dam par gshegs/ /yid 'phrog lha yi rdzas rnams kyang / /skyengs byed mchod pa sna tshogs dang / /bcas te chos kyi khri 'phang rtser/ /lha mi'i mgon du mnga' rab gsol/ /de nas chos kyi me chen pos/ /'khor ba'i bud shing tshogs bsregs shing / /thar pa mchog gi lam bzang ni/ /nyin bzhin kun tu gsal bar byas/ /khyod ni ris su med pa yi/ /bstan pa'i srog shing gcig pu ste/ /mtha' klas lus can thams cad kyi/ /phan bde'i rtsa lag dam par gyur/ /thos bsam sgom pa'i gzings chen gyis/ /shes bya'i rgya mtsho brgal zin kyang / /da dung klog dang spong ba la/ /bung bas sbrang rtsi len bzhin 'jug/ //gsum pa 'brel tshad don dang ldan pa'i ched du dbus gtsang dag pa'i zhing du chibs kyi kha lo bsgyur te rnam dkar gyi phrin las ji ltar mdzad pa'i tshul ni/ spyir chos rje 'di ni mkhyen brtse nus gsum sogs kyi