[A:103]yon tan bsam gyis mi khyab pa dang ldan pas/ skye bo rtog dpyod can rnams kyis nyin re bzhin du brtags kyang / de'i yon tan gyi tshogs ni je che je cher gyur pa las/ nam yang mtha' rtogs par mi nus pa zhig ste/ de la brten nas bod chen po'i ljongs kyi skye 'gro thams cad kyi gtsug gi nor bus btud cing / rang rang gi bdog pa'i dngos po rnams phangs pa med par rje 'di'i phyag tu gtong ba sogs longs spyod kyi 'bul ba shin tu rgya che ba byung yang / rang don du mngon par zhen pa cung zad kyang mi mnga' ste/ gcig la dper mtshon na/ skabs shig za 'og gi gos chen gya nom pa 'ga' zhig 'byor bar/ zhabs 'bring ba rnams kyis 'di la na bza' zhig bzos na legs tshul nan gyis zhus par/ rje 'di'i zhal nas/ rang re'i nor 'di gshin gson gyi dad rdzas sha stag yin pas/ hab thob tu longs spyad mi rung / des na 'di la thog mar dkon mchog gi rten gyi drung du mchod pa'i yo byad gang thon zhig bgyis te/ de'i lhag 'phro phran bu byung tshe gos 'dra bcos na las/ de min longs spyad chog rgyu min gsungs nas mchod pa'i yo byad bzos pa sogs rang don du til 'bru tsam yang mi 'dzin/ der ma zad rang nyid bzang por bsgrub pa'i ched du dgos med kyi thabs skyong dang / rnyed pas rnyed pa tshol ba dang / rab tu byung ba'i yo byad kyis khyim pa rnams kyi sems 'dzin pa la sogs pa log pa'i 'tsho ba dang / ma dag pa'i sbyin pas rang gzhan thams cad nyes dmigs chen por sbyor ba'i skye bo ngan pa'i spyod tshul mtha' dag rgyang ring du dor bar mdzad de/ dper mtshon na/ skabs 'gar chos rgyal chen po sras yum rnams rje 'di'i bzhugs gnas phan gling bla brang du bka' chos zhu bar phebs pa'i tshe/ thams cad kyis gsol ja re dang / bzhes