[A:10]gyi rgyal ba sras dang bcas pa thams cad mchod pa bas/ bla ma'i ba spu'i khung bu gcig la bsnyen bkur ba bsod nams ches khyad par du 'phags par khyab bdag rdo rje sems dpa' nyid kyis bka' stsal te/ dpal gsang ba 'dus pa'i rgyud phyi ma las/ rigs kyi bu sangs rgyas bcom ldan 'das phyogs bcu na ji snyed cig bzhugs shing rab tu spyod pa'i sangs rgyas bcom ldan 'das de rnams kyi sku dang gsung dang thugs rdo rje las byung ba'i bsod nams kyi phung po ji snyed pa de bas kyang slob dpon gyi ba spu'i bu ga gcig gi bsod nams khyad par du 'phags so/ /zhes sogs gsungs pa'i phyir ro/ /de lta bu'i rdo rje slob dpon de la phyogs bcu'i 'jig rten gyi khams mu med pa na bzhugs pa'i de bzhin gshegs pa thams cad dang / byang chub sems dpa' rnams kyis kyang yang nas yang du mchod pa mdzad par gsungs te/ don dam bsnyen pa las/ yon tan ldan pa'i sras rnams la ni 'khor ba 'joms/ /rang lus tshangs pa'i 'jig rten gnas ni kun tu ston/ /de ni bla ma dpal te bla ma dpal gzhan min/ /dpag med sangs rgyas kyis kyang rtag tu de la mchod/ /phyogs bzhugs sangs rgyas sems dpa' rtag tu de la 'dud/ /ces sogs rgyud sde rin po che rnams las rgya cher gsungs so/ /des na rigs thams cad kyi khyab bdag dpal ldan rdo rje sems dpa' dang gnyis su mi phyed pa'i bla ma dam pa rnams kyi rnam par thar pa phyogs re tsam mthong zhing thos pa dang / yi ger 'dri ba dang / gzhan dag la'ang cung zad bsnyad du yod pa 'di ni nges par yang srid snga ma rnams su bsod nams kyi tshogs mi dman tsam bsags pa'i mthu las byung bar gor ma chag cing / 'di lta bu ni skye ba brgya phrag du mar yang rnyed par dka' ba'i gnas yin no/ /de'i phyir