[A:113]dbang kun dga' rin chen/ mgon po dngos grub dpal 'bar/ 'jam mgon kun dga' rgyal mtshan te sku mched bzhi dang / rje btsun ma 'chi med bstan pa'i nyi ma gtsos pa'i rje btsun ma rnams dang / lha khang mkhan rin po che dang / zhabs pad bcas kyi sku sger so sor yang 'bul ba gang zab dang / gzhan yang gsol gzim mgron gnyer sogs las tshan thams cad la'ang 'dris zab dang bstun pa'i ja gsar sogs skabs su gang babs dang / khyad par du'ang skye dgu thams cad kyi phan bde'i rtsa lag dam par gyur pa'i bde bar gshegs pa'i rten gsum ngo mtshar can byin rlabs kyi gzi 'od 'bar ba rnams kyi mdun du mchod pa'i dngos po bzang zhing rgya che ba dang / chos sde lho byang rnams su bzhugs pa'i dge 'dun ji snyed mchis pa rnams la mang ja dang gral 'gyed sogs zab par mdzad nas ngor du byon/ zhwa lu chos sde dang / rgyal rtse dpal 'khor chos sde sogs nye skor gyi dgon khag phal mo cher mang 'gyed sogs stob pa dang / thar rtse rang gi lha khang rnams su rab tu gnas pa'i cho ga rgyas par mdzad pa sogs rnam dkar gyi phrin las kho nas dus 'da' bar mdzad do/ /de nas dgung lo zhe gnyis pa me stag lo'i hor zla bdun pa'i nang mang mkhar chu tshan du byon/ de zhor rting skyes sogs su'ang phebs te/ de phyogs kyi dgon pa phal che bar mang ja'i bsnyen bkur sogs mdzad nas ngor du byon/ rje rang gi sku'i dbon bdag cag gi rnam 'dren dam pa mtshan brjod par dka' ba don gyi slad du mtshan nas smos na byams pa kun dga' bstan 'dzin dang / rnal 'byor 'jam dpal bzang po gnyis la gsung ngag rin po che tshogs bshad dang / slob bshad