[A:120]lhun grub steng gi rgyal khab tu phebs/ rje 'di la 'phral du phebs dgos pa'i bang mi gcig rjes gnyis mthud lta bur 'byor bar brten myur du byon/ hor zla dgu pa'i tshes mgor 'dzings pho brang chen por chos rgyal mchog dbyar gzigs su phebs 'dug pa dang zhal 'dzom/ zla ba de'i mjug du sde dge dang lhan cig dngul mda' dgon chen du byon/ chos rgyal chen por dbu thon 'bul ba sogs skabs su bab pa'i lugs gnyis kyi thugs brel rnams bcad/ khyad par chos rgyal mchog nas slar yang gsung ngag rin po che slob bshad kyi chos 'khor bskor bar gsol ba btab pa bzhin/ sa mo yos bu'i lo'i hor zla gnyis pa'i yar tshes nas brtsams te/ mkhyen brtse nus pa'i bdag nyid dbon rin po che rnal 'byor 'jam dpal bzang po pa dang / bstan pa'i snang byed dam pa klu ldings zhabs drung rin po che ngag dbang bstan pa'i rgyal mtshan pa dang / stobs kyi 'khor los sgyur ba chos rgyal chen po tshe dbang rdo rje rig 'dzin pa dang / mkhas pa'i dbang po zhu slob kun dga' don grub pa dang / gdong dgon bla ma bstan 'dzin phun tshogs bcas la gsung ngag rin po che phal cher gyi rna bar ma lhung ba'i gsang chen slob bshad kyi skor gyi khrid dngos nyin grangs nyung la/ cha lag rnams rdzogs par stsal te hor zla gsum pa'i mjug tu yongs su grub par mdzad do/ /de skabs zhabs 'bam lta bus bsnyun tshabs che tsam byung rung / slar rim gyis sku khams dwangs pa na/ khu dbon lhan rgyas nas dpal kye rdo rje'i dkyil 'khor chen po bzhengs te sgrub cing mchod pa zhag bdun tsam mdzad/ de nas hor zla drug pa'i nang khu dbon gnyis char rma rong chu tshan du phebs/ der zhag bdun tsam bzhugs nas dbon rnal 'byor 'jam dpal bzang po dgon chen du byon/ rje 'di sde dge chos