[A:122]gnam du 'phyo ba yi/ /chu bo gyen du rab bzlog pas/ /rnal 'byor dbang phyug birWa par/ /'gran pa'i spun zla gnyis par byas/ /de lta'i grags snyan gur gum gyis/ /phyogs dang phyogs bral lus phra ma'i/ /bzhin gyi dkyil 'khor mdzes pa'i ngos/ /bris pa'i ri mo bsub tu med// //spyi don bzhi pa mkhas btsun bzang gsum sogs kyi yon tan bye brag tu bshad pa la gnyis te/ dngos dang / zhar byung phrin las kyi rgyun skyong ba'i zhal slob ji ltar byung ba'i tshul lo/ /dang po ni/ chos kyi rje 'dis gong du bshad pa ltar gyi dpal ldan bla ma dam pa rnams dang / der mi gsal bar 'ga' zhig dang bcas te/ mdor na yongs 'dzin dam pa bcu phrag lnga lhag tsam las phyi rig pa'i gnas dang / nang sde snod gsum dang rgyud sde bzhi la sogs pa'i chos kyi bdud rtsi ngoms pa med par gsol te/ de dag kyang thos lo dang shes lo tsam du ma bzhag par/ bsam byung gi rig pas sgro 'dogs thams cad yang dang yang du bcad cing / sgom pas thugs nyams su bzhes pa la brten nas/ tshig dang don gyi cha ma lus pa thugs su chud pa'i mkhas pa chen por gyur cing / de la brten nas chos kyi 'khor lo bskor ba'i tshul yang / gong du smos pa ltar dpal e wa~M chos ldan gyi mkhan tshab mdzad pa'i tshe gsung ngag rin po che tshogs bshad tshar gcig /gdan sa skyong ba'i tshe tshar gsum/ sku'i dbon du gyur pa'i thugs sras dam pa gnyis la tshar gcig ste tshogs bshad tshar lnga dang / slob bshad ni dbon rin po che rnam pa gnyis su tshar gcig dang / sde dge chos rgyal mchog gis snga phyir gsol ba btab pa'i ngor tshar gnyis te/ mdor na lam 'bras tshogs slob tshar brgyad kyi gtsos pa'i rje rang gis gsan pa'i