[A:127] phur/ zhal/ dur bdag /las mgon/ stag zhon/ dmar zor/ bektse/ phyogs skyong / las gshin/ mkha' 'gro spyi ste de rnams la gtor 'bul gyi cho ga shin tu rgyas pa dang bcas pa ma chags par mdzad de/ mdor na chos 'chad spel gyi skabs tsam ma gtogs thugs dam kho na la rtse gcig tu mdzad pa'i stobs kyis mchog dang thun mong gi dngos grub bsam gyis mi khyab pa zhig la mnga' brnyes par gdon mi za ste/ skabs shig rje rang gi zhal nas/ o rgyan rin po che 'di dus rgyun du nged rang gi mthong snang la 'bral ba med pa zhig yin pas/ bris thang zhig bzhengs dgos gsungs te/ de ltar bzhengs pa'i ras bris de da lta thar rtse rang du bzhugs/ des mtshon yi dam gyi lha mang po zhig gis zhal gzigs shing / byin gyis brlabs par mngon mod/ sku zil che bas sus kyang bka' 'dri zhu mi nus shing / rgyun par gsung sgros ni cher mi mdzad pas shes par ga la nus/ lam 'bras sogs las/ 'das lam sa dang po nas drug pa'i bar la bum dbang gi lam bskyed rim mthar phyin te/ de tsam na lha dang gzhal yas khang las logs na gzhan pa'i snod bcud med cing / 'khor 'das thams cad rang sems gnyis su med pa'i ye shes dang dbyer med du rtogs te/ de las gzhan pa'i dngos po mi snang bas rtsig pa dang ri la thogs pa med/ snang ba la dbang thob pas stong gsum yungs 'brur chud pa la che chung med/ byang sems gyen la log pas chu bo gyen la ldog /thig le dkar dmar 'ching nus pas nyi zla gteng bar 'dzin/ sems la dbang thob pas gcig las mang por byed cing mang po las gcig tu byed nus par bshad pa ltar/ bum dbang gi lam