[A:134]'gro ba thams cad 'khor ba'i rgya mtsho chen po las sgrol ba'i 'dren pa dam par mnga' gsol/ 'ga' zhig ni rang don mthar phyin te ma 'ongs pa na 'gro ba rnams 'dren pa'i nus pa dang ldan par mdzad/ mdor na sku mthong ba dang / gsung thos pa dang / mtshan tsam yid la byed pa tshun chad kyang phan pa dang bde ba'i lam la bkod pa sogs sku dngos kyis 'dul bar 'os pa'i gdul bya thams cad ni legs par btul/ da ni gdul bya 'di bas zhing khams gzhan du rgya che bar dgongs nas yongs su mya ngan las 'da' ba'i tshul bstan par bzhed de/ de'ang sngar dgung lo lnga bcu nga gnyis su phebs pa me byi lo'i skabs shig nyin gung gung tshigs rnams bzhes grub 'phral/ cung zad mnal du song ba'i mnal lam du/ 'brug lta bu'i sems can 'jigs su rung ba zhig gi mgo zhig byung nas/ nged kyi mgo 'di byang gi phyogs su khyer 'gro ba'i snang ba zhig byung bas/ slar lcags 'brug lor nged rang gi tshe la bar chad 'ong nyen yod ces zhabs 'bring ba thams cad la gsungs pa dang / de rjes dgung lo nga bzhi pa sa stag lor brag la phur pa btab pa sogs mdzad pas/ chos rgyal chen pos dbus skyes bu blo gros dang ldan pa rnams kyis/ rje 'dis dus rgyun du yon tan thams cad bum nang gi mar me bzhin du sbas te sgrub rtags sna re'ang mi ston pa la/ deng sang grub pa'i mtshan ma khyad par du 'phags pa 'di lta bu 'jog par mdzad pas/ da ni mi ring bar gdul bya gzhan don la gshegs pa'i ltas 'dra min nam zhes gleng bar byed cing / phal cher the tshom gyi drwa bar chud par gyur/ de nas dgung grangs nga lnga pa sa yos hor zla bcu pa'i nang mkhar gsum mdor byon/ der zhag bco lnga tsam bzhugs nas