[A:13]btsun gong ma lnga la sogs pa'i yab sras brgyud pa dang bcas pa dang / de dag gi slob ma dang nying slob kyi tshogs bsam gyis mi khyab pa dang bcas pas dam pa'i chos ma dag pa rnams dag par byas/ dag pa rnams gong nas gong 'phel du mdzad pa la sogs pa'i sgo nas/ mdor na sangs rgyas kyi bstan pa nam langs pa'i rjes su nyi ma shar ba ltar dar zhing rgyas par mdzad do/ /de nas kyang phyis su thub pa'i bstan pa spyi dang / bye brag rje btsun sa skya pa rnams kyi bzhed srol 'dzin pa rnams kyi nang nas gtsug gi nor bu ltar gyur pa/ sngags kyi bstan pa 'dzin pa la ngor rdzong gnyis su grags pa'i nang nas ches mchog tu gyur pa ni/ bcom ldan 'das thub pa'i dbang pos lung bstan gyi me tog lan gcig ma yin par yang nas yang du 'thor ba'i ngor chen rdo rje 'chang kun dga' bzang po zhes mtshan snyan gyi gdugs dkar srid pa dang zhi ba'i khyon thams cad yongs su khebs pa de nyid 'jig rten du byon te/ de bzhin gshegs pa'i bstan pa la ston pa gnyis pa lta bu'i mdzad pa rlabs po che'i sgo nas/ rgyal ba'i bstan pa rin po che spyi dang / bye brag rdo rje theg pa'i chos skor thams cad sa'i steng phal che bar dar zhing rgyas par mdzad pa yin no/ /de nas kyang rje de nyid kyi rgyal tshab tu mi 'jigs gdong lngas bteg pa'i chos kyi khri 'phang mthon por mnga' gsol ba'i bstan 'dzin gyi skyes bu bar ma chad pa mu tig bstar la brgyus pa ltar byon pa rnams kyis kyang / mkhas pa'i bya ba rnam pa gsum gyi sgo nas gong gi bzhed srol mtha' dag mi nyams shing 'phel bar mdzad pa rnams kyi nang nas bdag cag gi bla ma/ khams gsum gyi mgon po/ byang chub sems dpa' rnams kyi gtso