[A:31]pa rnam par dag pa legs par bzhes te/ mtshan byams pa nam mkha' bzang po zhes bya bar gsol to/ /de nas brtsams te sngon gyi 'phags pa dgra bcom pa rnams dang tshul mtshungs par tshul khrims kyi bslab pa rin po che mig 'bras ltar gces par bzung ste/ bslab bya phra zhing phra ba rnams kyang ma nyams par mdzad pa yin no/ /mdor na bdag nyid chen po 'di ni bskal pa dpag tu med pa'i sngon rol nas thams cad mkhyen pa'i go 'phang bdag gir mdzad zin na'ang / rgyal ba'i bstan pa la 'jug pa rnams kyi mngon par rtogs pa ni/ ji skad du/ tshul gnas thos dang bsam ldan pas/ /sgom pa la ni rab tu sbyor/ /zhes gsungs pa ltar thog mar rgyud sdom pa gsum ldan du byas nas/ thos bsam sgom gsum la rim gyis slob dgos pa yin no zhes shes pa'i ched du rang nyid kyang de'i rjes su slob par bzhed nas/ dgung lo bcu gnyis su phebs pa na/ rigs thams cad kyi bdag po dpal ldan rdo rje sems dpa' dang dbyer ma mchis pa phan khang dbon rin po che rin chen mchog grub pa'i drung du/ thams cad mkhyen pa dkon mchog lhun grub pa'i yig cha rnams kyi steng nas/ dpal dgyes pa rdo rje'i ras bris kyi dkyil 'khor chen por rgyu dus kyi dbang bskur ba legs par gsan te dge tshul rdo rje 'dzin pa chen por gyur pa yin no/ /de phyin chad rtsa ba dang yan lag gi nyes pa phra zhing phra ba rnams kyang srung sdom gyi rwa ba las nam yang mi 'da' bar mdzad do/ /gzhan yang chos kyi rje de'i drung nas snga phyir chos gsan pa'i rnam grangs la/ thar paN gyi yig cha'i steng nas 'jam dkar ma ti lugs kyi rjes gnang lung bcas/ zhu