[A:30]sgor zhugs nas thos bsam sgom gsum gyis rang rgyud grol bar mdzad pa'i tshul la gnyis te/ tshigs snga ma dge tshul du bsgrubs te gsan bsam sgom gsum ji ltar mdzad pa'i tshul dang / tshigs phyi ma bsnyen par rdzogs pa dge slong gi dngos por bsgrubs te nyan bshad sgom gsum ji ltar mdzad pa'i tshul lo/ /dang po ni/ 'di ltar dga' bo rab tu byung ba'i mdo las/ khyim pa rnams ni me 'obs na gnas pa lta bu'o/ /rab tu byung ba rnams ni bsil khang na gnas pa lta bu'o/ /zhes gsungs pa ltar 'khor ba mtha' dag ni dug can gyi kha zas bzhin du sdug bsngal gyi rtsa bar gzigs shing / de las thar bar byed pa'i lam rnams kyi gtso bo ni lhag pa'i tshul khrims kyi bslab pa nyid du dgongs la/ rgyal ba'i bstan pa 'dzin pa'i skyes bu rnams kyi khrod na'ang ngur smrig 'chang ba rnams ni rgyu skar gyi dbus na zla ba'i dkyil 'khor bzhin du rab dang / mchog dang / phul du gyur par gzigs nas/ nges par 'byung ba'i thugs kyi kun slong rnam par dag pas kun nas bslangs te/ dgung lo bdun pa stod 'grel ba'i lugs kyi bong bu zhes pa/ ljongs 'dir dbang thang dang bstun pa'i lcags mo yos bu'i lor/ legs par gsung pa'i chos 'dul rgya mtsho'i pha rol tu son pa khang gsar mkhan rin po che ngag dbang chos skyong bzang por mkhan po zhus/ gzhan yang las kyi slob dpon la sogs pa'i dge slong du ma dang bcas pa'i dbus su/ /dge bsnyen gyi sdom pa sngon du 'gro ba'i sgo nas khyim pa'i rtags thams cad lam gzhi mdo'i rtswa ltar dor/ rab tu byung ba'i rtags rnams bung bas sbrang rtsi len pa bzhin du yang dag par blangs/ dngos gzhi dge tshul gyi sdom