[A:64]dang / yar klung mchog sprul nam mkha' legs pa lhun grub gnyis la gtad cing / de'i nang nas kyang gtso bor rje 'di la bstan pa gtad pa yin zhing / sku tshe 'di tsam du ma zad yang srid snga ma rnams su'ang phan tshun bla slob tu gyur nas zab chos kyi bstan pa gtad len rgyun ma chad par byung ba yin no zhes lung bstan pa dang bcas mdzad do/ /zhes gleng ngo / /don 'di la dgongs nas rigs ldan chos rgyal mchog gis mdzad pa'i rnam thar gsol 'debs las/ sangs rgyas kun dngos ngag dbang lha yi sku/ /'khrul bral legs bshad 'gro kun dga' mdzad gsung / /sgrib bral dus gsum kun mkhyen blo gros kyis/ /thugs sras zhal bzhes rjes su bzung la 'dud/ /rtag tu ngu dang nor bzang gzhon nu ltar/ /dad gus bkur sti phun sum tshogs pa yis/ /bdag chen thams cad mkhyen pa mnyes byas nas/ /zab rgyas chos tshul rgya mtsho gsan la 'dud/ /khyad par rgyud sde kun gyi bcud phyung ba/ /gsung ngag tshogs slob smin grol cha lag bcas/ /gtsor gyur sa chen thugs thig ma lus stsal/ /snyan brgyud rgya mtsho'i mnga' bdag gyur la 'dud/ /'khon ston dbang por rgyal ba ngor chen rjes/ /zhal gzigs bstan 'dzin khyad can 'byung zhes gsungs/ /rje 'dis deng dus sa ngor bstan pa'i srog /legs bzung nges rnyed bstan 'dzin dam par 'dud/ /'jam dbyangs bla mas yar klung mchog sprul dang / /rje 'dir gsung ngag bstan pa'i rgyal srid gtad/ /sku phreng rim par zab chos gtad len tshul/ /yin zhes bslu med lung bstan stsal la 'dud/ /ces sogs gsungs pa yin no/ /gzhan yang dpal sa skya'i 'jam mgon chen po'i zhabs 'bring ba rig pa'i dbang phyug zhig las 'phags yul na snyan ngag smra ba