[A:76]bzhir phebs pa sa pho spre'u'i lo'i hor zla bcu gnyis pa'i nang / rgyal bas lung gis bsngags pa'i ngor chen rdo rje 'chang chen po'i chos kyi khri 'phang mthon por zhabs zung 'khor lo'i re khA rnam par bkod de 'jigs pa dang bag tsha ba med pa'i gsung gi gsang ba bsam gyis mi khyab pa dang ldan pa'i sgo nas/ lo der phyogs mtha' dag nas 'dus pa'i don gnyer nyis brgya lhag tsam la/ grub chen bi rU pa'i bzhed gzhung gsung ngag rin po che lam 'bras bu dang bcas pa'i chos kyi 'khor lo ma lus pa yongs su rdzogs par bskor te/ gdul bya ma smin pa rnams smin pa dang / smin pa rnams grol ba'i lam du 'god pa dang / thams cad kyang bstan pa'i rtsa ba so sor thar pa'i sdom pa la gnas par mdzad do/ /de lo bod chen po'i ljongs nas stobs kyi 'khor los sgyur ba sde dge chos rgyal chen po sa dbang bzang po'ang dbus gtsang gi rten gsum rnams dang / ris su med pa'i dgon sde rnams la bsnyen bkur stob pa'i phyir du byon zhing / rje 'di las chos kyi bdud rtsi cung zad bzhes pas sangs rgyas dngos kyi 'du shes skyes par grags so/ /de skabs snga phyi ci rigs par yi dam gyi lha'i ljags bsnyen mdzad pa'i rim pa'ang mkha' spyod ma'i bsnyen pa zla ba bzhi tsam dang / mgon dkar gyi bsnyen pa zla ba kha shas/ brag rdzong ma'i bsnyen pa zla ba drug tsam dang / sgrol dkar/ rnam rgyal ma/ tshe dpag med lha dgu rnams kyi bsnyen tshad mthar phyin pa dang / bcu cha'i sbyin sreg bcas mdzad pa yin no zhes thos so/ /e ma so thar rigs brgyad las/ /mchog tu gyur pa dge slong ste/ /mkha' la rgyu skar rab mang yang / /zla ba la ni 'gran nus su/ /de slad brtan mkhas yon