[A:81]smad kyi phyogs su byon nas 'gro ba rnams smin grol la bkod pa'i tshul/ 'brel tshad don dang ldan pa'i ched du dbus gtsang dag pa'i zhing du chibs kyi kha lo bsgyur te rnam dkar gyi phrin las ji ltar mdzad pa'i tshul/ slar yang bod chen po'i ljongs su byon nas 'gro don ji ltar mdzad pa'i tshul lo/ /dang po ni/ de ltar rgyal ba gnyis pa'i rgyab tshab tu mnga' gsol ma thag nas/ lo der 'dus pa'i don gnyer rnams la gsung ngag rin po che'i chos kyi 'khor lo bskor ba'i dbu 'dzugs par mdzad/ de nas bzung ste dgung lo nyer dgu pa chu glang lo'i bar gdan sa lo bzhir mdzad/ de'ang lcags khyi lor bal bod dmag 'khrugs kyi rkyen gyis dbus gtsang kun tu 'brum nad cig byung bar/ rje 'di'ang bsnyun tshul bzhes pas lo der bka' chos gnang ma thub par brten/ mkhas grub ngag dbang dam chos mkhan tshab tu mnga' gsol te/ gsung ngag lam 'bras kyi dbang khrid yongs su rdzogs par stsal/ de min lo re bzhin stod mnga' ris/ bar dbus gtsang / smad mdo khams rnams nas gdul bya skal ba dang ldan pa mang du 'dus pa rnams la dgun gyi dus gsung ngag rin po che lam 'bras bu dang bcas pa'i dbang khrid yongs su rdzogs pa tshar gsum dang / dpyid kyi dus lo re bzhin phyogs mtha' dag nas 'dus pa'i don gnyer nyis brgya skor las mi nyung bar/ dge bsnyen dang / dge tshul dang / dge slong gi sdom pa rnams so so'i cho ga rnam par dag pa'i sgo nas stsal te bstan pa rin po che'i sgor 'jug par mdzad cing / de dag gi skabs gseng rnams su'ang gdul bya so so'i mos pa dang mthun par theg pa chen po'i sems bskyed kyi sdom pa dang / blo sbyong la sogs pa pha rol tu phyin pa'i chos mang po