[A:80]gyis mnga' gsol ba ltar chos kyi rgyal srid chen por yongs su mnga' gsol bas skal pa bzang po'i dus ston dgung la reg par gyur to/ /de ltar bgyis pa'i dge ba rang rang gi rgyud la ji snyed cig mchis pa rnams kyang bar ma dor chud mi za ba'i phyir du 'khor gsum rnam par dag pa'i bsngo ba'i rgyas 'debs pa sogs mdzad cing / de lta bu'i dus kyi tshe'ang phyogs bcu'i rgyal ba sras dang bcas pa rnams kyis shis pa brjod pa'i rgyal rnga dal gyis brdungs par gdon mi za zhing / nam mkha'i khams thams cad kyang 'ja' sprin srab mos khebs pa la sogs pa ngo mtshar ba'i ltas mang du byung ba yin no/ /'od kyis zla bzhin zla ba yis/ /mtshan mo mdzes pa'i dpal ji bzhin/ /mkhyen brtse nus pa mtha' yas pas/ /'dren pa khyod la dpal rab 'dzin/ /de slad lha klu mi bcas kyis/ /mchod pa'i khyad par mang thogs nas/ /thub dbang chos kyi rgyal srid la/ /mnga' gsol dus kyi nyi ma shar/ /de tshe dge mtshan brgya phrag gis/ /phyogs kun dog por bkang ba 'dis/ /srid gsum byed por rlom rnams kyi/ /khengs pa'i ri bo bsnyil gyis dogs/ /de lta'i ngo mtshar rmad byung bar/ /'gran phyir phyogs bcu'i rgyal rnams kyis/ /shis par brjod pa'i tambu ra/ /sbreng ba'i ngal ba 'dzin min nam/ /e ma phan bde'i chu gter ni/ /dbyar gyi mtsho la 'gran pa bzhin/ /sdug bsngal ba dang bdud kyi sde/ /dgun gyi me tog bzhin du gyur// //gnyis pa bstan 'gro'i don ji ltar mdzad pa'i tshul la bzhi ste/ kun mkhyen e wa~M pa chen po'i gdan sar bzhugs nas bstan pa'i bgyi ba ji ltar mdzad pa'i tshul/ sde dge chos rgyal chen pos spyan drangs te mdo khams