[B:56a]ཡ་ཚལ་རླུང་གི་བསྐྱོད་པ་བཞིན། །
འཆི་མེད་ལྷ་ཡི་སིལ་སྙན་སྣ་ཚོགས་པ། །
སྔར་མེད་སྒྲ་ནི་ཡུན་དུ་གྲག་པར་གྱུར། །
སྐབས་གསུམ་མཛེས་མའི་ལག་པར་གསེར་གདུབ་དག་།
རིན་ཆེན་རྡུལ་བརྩེགས་དགའ་མའི་ཕྲག་པ་ནས། །
གངས་རི་དུ་གཱུ་ལ་ཡི་སྟོད་གཡོགས་ཀྱི། །
འཆིང་བ་གྲོལ་ནས་ཐུར་དུ་ལྷུང་བ་དག་།
ནོར་འཛིན་ཡངས་པའི་པང་དུ་འཁྱིལ་བ་བཞིན། །
འཇིག་རྟེན་རྒྱན་དེ་ཞིང་གཞན་གཤེགས་པ་ན། །
རྒྱ་མཚོའི་གོས་ཅན་མ་འདི་མྱ་ངན་གྱིས། །
དགའ་བའི་ཡིད་འཁྲུགས་གཡོ་ཞིང་འདར་བ་ནི། །
རྒྱ་མཚོའི་ཀློང་གི་གྲུ་གཟིངས་ཇི་བཞིན་ནོ། །
དེར་ནི་དད་ལྡན་འགའ་ཞིག་འདྲེན་བྱེད་ལས། །
མཆི་མའི་ཆུ་ཀླུང་མི་ཟད་འབེབས་བཞིན་དུ། །
ཤུགས་རིངས་གདུང་བའི་དབུགས་ཀྱིས་མགྲིན་པ་དག་།
རབ་ཏུ་འགགས་པའི་འཛེར་འཛེར་ཆོ་ངེ་འདོན། །
ཁ་ཅིག་རྩ་བ་བཅད་པའི་ལྗོན་ཤིང་ལྟར། །
མཉམ་པའི་ས་ལའང་ལན་བརྒྱར་འགྱེལ་ཞིང་འདྲེ། །
གཞན་དག་དྲན་ཉམས་མི་གཡོ་སེམས་བྲལ་བཞིན། །
[A:187]ཕལ་ཆེར་མྱ་ངན་མུན་པའི་མལ་ནང་བཅུག་།
དམ་པའི་མགོན་དང་བྲལ་བའི་སྡུག་བསྔལ་གྱི། །
རིམས་ནད་དྲག་པོས་བདེ་བའི་གོ་སྐབས་བྲལ། །
བདག་ཅག་གདུལ་བྱའི་ཐ་ཤལ་སྐལ་དམན་ལ། །
བརྩེ་ཆེན་ཁྱོད་ཀྱི་བརྩེ་བའང་མིང་དུ་བས། །
བདག་གི་ཡབ་གཅིག་བརྩེ་མེད་ལྷ་རྣམས་ཀྱི། །
དབང་པོས་དག་པའི་ཞིང་དུ་སྤྱན་འདྲེན་སླད། །
ལྷ་ཡི་དགའ་སྟོན་བསྟར་བའི་ཆོ་ག་འདི། །
ངོ་མཚར་གྱུར་མོད་ཅི་སླད་བྱུང་བསམས་ན། །
བདག་ཅག་སྙིང་ལ་མི་ཟད་མྱ་ངན་རྒྱུ། །
ལྷ་ཡི་མེ་ཏོག་གཉེན་ཞིང་འཇམ་པ་ཡང་། །
དད་ལྡན་ལུས་ལ་ཚེར་མ་བས་ཀྱང་རྩུབ། །
ཚངས་པའི་རྒྱུད་མང་ལྟར་སྙན་རོལ་མོའི་སྒྲ། །
རྣ་བ་གཙེར་ལ་རྣོ་བའི་ཐུར་མ་བཞིན། །
ཙན་དན་སྦྲུལ་གྱི་སྙིང་པོའི་དྲི་བསུང་ཡང་། །
སྙིང་ལ་གདུང་བའི་མེ་ལྕེ་འབར་བའི་གྲོགས། །
རྨ་བྱའི་གདུགས་ལྟར་བཀྲ་བའི་བརྒྱ་བྱིན་གཞུ། །
མཐོང་བས་བདག་གིས་མིག་གི་དུག་ཏུ་