[A:23]gdan bzhi'i 'grel pa yan lag dang bcas pa dang / sangs rgyas mnyam sbyor gyi rgyud 'grel pa yan lag dang bcas pa rnams dang / sgrub thabs bsdus pa dang / man ngag phra mo brjod kyis mi lang ba gsan cing khong du chud par mdzad pa yin no/ /de nas rong ngur smrig tu brang ti dar ma snying po zhes bya ba'i drung du dgung lo bcu gsum pa la mngon pa tshar gcig gis thugs su chud par mdzad nas bshad pa yang mdzad pa yin no/ /de nas nyang stod byang 'chad ces bya ba'i gtsug lag khang du brang ti'i zur chos pa dge ba'i bshes gnyen khyung zhes bya ba'i drung du nye bar bsnyen te/ rgyas pa'i bstan bcos byang chub sems dpa'i sa dang / sdom gnyis phra mo dang bcas pa gsan te khong du chud par mdzad/ de nas yang nyang stod du khyung rin chen grags pa zhes bya ba dang / zur chos pa dpal mi dig pa zhes bya ba las tshad ma la sogs pa mang du gsan no/ /de nas yang grom pa g.yu rtse 'jid phur/ dge bshes me lhang rtser ba zhes bya ba la tshad ma rnam par nges pa dang / rigs pa'i thigs pa'i rgya cher 'grel pa bam po lnga pa dang / dbu ma rang rgyud shar gsum du grags pa rnams gsan cing khong du chud par mdzad pa yin no/ /de nas yang g.yas ru'i stag ris kyi sa'i cha sgyi chu'i gtsug lag khang zhes bya bar yongs kyi dge ba'i bshes gnyen sgyi chu ba zhes bya ba'i zhabs drung du nye bar bsnyen te/ sngar nyid kyi yab las gsan pa'i dgyes pa rdo rje'i rgyud rgyas pa gsum/ rgyud chung gsum 'grel pa ku mu ti dang / yan lag phra mo du ma dang bcas pa rnams dang / de'i man ngag dang bcas pa rnams kyang gsan/ yang dge ba'i bshes gnyen de nyid la bram ze nag po pa'i bshad srol gyi dgyes pa rdo rje bla ma 'gos las brgyud de bla ma mnga' ris pa nyid la gsan pa rnal 'byor rin po che sbyor ba'i phreng ba zhes pa'i 'grel pa yan lag du ma dang / man ngag du ma dang bcas