[A:26]lugs du ma rnams kyang gsan no/ /de nas yang lho stod du bla ma pu hrang pa lo chung gi drung du nye bar bsnyen te/ bla ma bal po bha danta las nos pa'i dpal bde mchog gi skor rnams dang / bla ma hang du dkar po las nos pa'i rdo rje rnal 'byor ma'i skor rnams dang / bla ma hang du de nyid las nos pa'i dpal gsang ba 'dus pa'i arga la sogs pa'i chos gsum yang gsan/ yang bla ma de nyid kyis/ bla ma rgyal po'i sras las nos pa'i dpal dus kyi 'khor lo yan lag dang bcas pa dang / bya ba'i rgyud kyi phyogs 'ga' dang bcas pa gsan cing khong du chud par mdzad pa yin no/ /de nas yang grom pa'i stod kyi skyed lhas dgon par dge ba'i bshes gnyen kha'u pa sku mched kyi drung du nye bar bsnyen te/ chos mang du gsan pa ni 'di lta ste/ bya ba'i rgyud rig pa mchog dang / legs par grub pa dang / dpung pa bzang po dang / phyag na rdo rje dbang bskur ba'i rgyud las/ zhi ba'i blo gros gang gi tshe byang chub sems dpa'i spyad pa gsang sngags kyi sgo'i spyod pa'i bdag nyid rang gi lha'i gzugs su byas la zhes bdag bskyed bshad pas bya ba'i rgyud ma yin spyod pa'i rgyud yin pa dang / gsang ba spyi rgyud dang / bsam gtan phyi ma dang / dam tshig gsum bkod pa la sogs pa'i rgyud dang / de dag gi 'grel pa yan lag phra mo dang bcas pa rnams kyang gsan no/ /spyod pa'i rgyud la rnam par snang mdzad mngon par byang chub pa'i rgyud dang / 'grel pa dang / yan lag dang bcas pa rnams kyang gsan no/ /bya ba dang spyod pa'i rgyud gnyis ni dge ba'i bshes gnyen mnga' bdag lha ris pa zhes bya ba las nos pa yin no/ /yang dge ba'i bshes gnyen de nyid las rnal 'byor gyi rgyud nos pa ni/ 'phags pa de kho na nyid bsdus pa'i 'grel pa de nyid snang ba zhes bya ba stong phrag bco brgyad pa dang / ko sa la'i rgyan zhes bya ba stong phrag bcu bzhi pa dang / dpal mchog dang po'i 'grel pa stong phrag nyi shu rtsa lnga pa dang / rgyud
rkyang
gi