[A:257]tshogs 'du mdzad pa sngon du 'gro ba'i zab pa dang rgya che ba'i chos 'khor ji ltar bskor ba'i tshul dang / byang phyogs bod kyi rgyal po gzhung sa dga' ldan pho brang pa chen pos chen por 'os pa'i mtshan dang yo byad kyis chen po'i go sar mnga' gsol nas rnam dkar gyi phrin las ji ltar mdzad pa'i tshul lo/ /de'i dang po ni 'di ltar rjes su thos te/ rje 'di mkhyen brtse nus gsum gyi yon tan mtshungs zla ma mchis par brten zang zing gi longs spyod dbyar mtsho bzhin 'phel bar gyur mod/ ji skad du/ dbu ma bshes pa'i spring yig las/ longs spyod g.yo ba snying po med mkhyen nas/ /dge slong bram ze bkren dang bshes rnams la/ /sbyin pa tshul bzhin stsal bgyi pha rol tu/ /sbyin las gzhan pa'i gnyen mchog ma mchis so/ /zhes gsungs pa ltar snying po med pa'i nor rdzas rnams las snying po dam pa len pa'i phyir du dbus gtsang dag pa'i zhing du bsnyen bkur stob pa dang / rje rang yang sku tshe'i smad du 'du 'dzi dang rnam g.yeng spangs te bshad sgrub la brtson pa lhur bzhes pa'i slad du chos rgyal chen por dgongs khrol yang yang zhu bar mdzad par rim gyis me bya lor bod du 'byon chog pa'i dgongs khrol byung bar brten/ de skor gyi nyer bsdogs rnams brtsams pa dang / don gnyer so so'i chos kyi 'phro rnams kyang rdzogs par mdzad pa dang / nye skor gyi dgon khag so sor mang ja dang 'gyed chas gtan gzhag sogs gya nom pa dang / khyad par lhun grub steng gi chos grwa chen por dge 'dun bdun brgya tsam bzhugs pa thams cad kyis kun rig gi cho ga nyin bzhi lnga tsam tshogs par nyin re bzhin dge 'dun brgyad re la phyag 'gyed ljon ja sbag re dang / bcu re la ljon ja sbag re spel mar mdzad pa dang lhan cig lhun grub steng gi gtsug lag khang du gos chen bzang bsgrigs kyi phye phur cha dang /