[A:256]du bskrad pa la sogs pa zhi rgyas dbang drag dang rjes su 'brel ba'i sgo nas phyogs de'i bde skyid dgung la reg par mdzad pa yin la/ 'di skabs bdag cag gi dpal ldan bla ma dam pa mkhas btsun grub pa'i khyu mchog zhabs drung rin po che 'jam dbyangs nam mkha' rgyal mtshan pa'ang bod nas phebs te sku rtsar bcar bzhugs kyi ngos gsung gi bdud rtsi mtha' yas pa bzhes pa sogs thugs sras kyi dwang mar gyur pa yin no/ /kun gyi bran bzhin 'gro don la/ /brtson pas rang bde thob pa rnams/ /rtag tu gzhan la phan pa'i las/ /rang gi srog bzhin 'dor mi byed/ /kun la snyoms pa'i nyi 'od kyis/ /padmo lhag par dga' byed ltar/ /thugs rjer nye ring ma mchis kyang / /skal par ldan rnams rjes su 'dzin/ /smon lam g.yab mos bos pa yi/ /lus can thar par bkri ba'i slad/ /brtson 'grus shing rta la 'dzegs te/ /bod chen ljongs su gshegs par gyur/ /ngan par spyad rnams g.yang sa las/ /bsgral nas yang dag lam bzang la/ /sbyar mdzad rnam thar dpag dka' ba/ /rgyal ba rnams dang khyad par gang / /srid zhi ji bzhin gzigs pa'i nyis/ /bde chen ye shes cher bskyed de/ /sdug kun drung phyung bdud dpung btul/ /mgon pos chos 'khor yongs rdzogs bskor/ /thub bstan dbyar gyi mtsho bzhin du/ /spel ba'i dge mtshan phung po 'dis/ /sngon byon mkhan slob chos gsum gyi/ /grags pa'ang nyams par byas kyis dogs/ /khyod kyi phrin las zla 'od kyis/ /phun tshogs chu gter 'phel bgyid pa'i/ /sngon med ngo mtshar blta ba'i slad/ /nyi zla skar tshogs lhags par nges// //gsum pa slar yang rang gnas gdan sa chen por zhabs bkod de bstan 'gro'i don ji ltar mdzad pa'i tshul la gnyis te/ thog mar gtong ba chen po'i sgo 'phar yangs por phyes te bsod nams kyi