[A:276]bskor bas/ /ma dag pa yi 'jig rten kyang / /dag pa'i zhing khams bzhin du byas/ /'di na chos kyi bdud rtsi'i rgyun/ /'bebs par byed pa mang mod kyang / /khams dang bsam pa bag nyal la/ /brtags te ston pa khyod 'dra su/ /de slad shes bya kun gzigs pa'i/ /nyi ma'i gnyen de 'di min nam/ /gzhan du thams cad mkhyen pa yi/ /chos smra 'di 'dra ji ltar 'byung / /rang don byang chub brnyes bzhin du/ /zab mo'i lam la brtson pa sogs/ /'gro 'di thar par bkri ba'i slad/ /rgyal sras spyod tshul bsam mi khyab/ /nyes spyod phra zhing phra ba yang / /gzod ma nyid nas spangs zin phyir/ /de slad khyod kyi phrin las kyis/ /rtag tu phun tshogs 'ba' zhig ster// //gnyis pa byang phyogs bod kyi rgyal po gzhung sa dga' ldan pho brang pa chen pos chen por 'os pa'i mtshan dang yo byad kyis chen po'i go sar mnga' gsol nas rnam dkar gyi phrin las ji ltar mdzad pa'i tshul ni/ sngon bod chos rgyal mes dbon rnams kyi sku dus nas bzung ste/ deng sang gi bar du brang ti'i gdung rabs rim byon thams cad kyis spyir sangs rgyas kyi bstan pa la bya ba chen po byas shing / 'gro ba mang po phan pa dang bde ba'i lam la bkod pa dang / khyad par gzhung sa dga' ldan pho brang pa chen por yang rnam kun lhag bsam lhur len gyis sri zhu gang che zhus dang zhu mu yin par ma zad/ snga ma shing yos lo dang / me 'brug lo gnyis su yid srubs kyis rgyud bskul ba'i pha rol gorSha nas bod chos ldan gyi zhing khams su tshur rgol byung bar brten/ dmag 'khrugs gzhi che tsam byung ba'i skabs su'ang / rje 'di'i sku mched mdzod pa nor ldan shes rab bzang po gzhi rtse'i rta khal mgo byed du bsko bzhag stsal bar yang dpon