[A:296]skyed bsrings dam pa'i me tog ni/ /bsngags 'os dri bsung ring 'thul bas/ /phyogs rnams thams cad dog por byas/ /de tshe bshad dang sgrub pa yis/ /srid zhi'i khyon kun 'gengs pa dang / /lhan cig nying slob mkhas dang grub/ /sa chen rdul dang mnyam par sprul/ /de slad dngos dang brgyud pa yi/ /bka' drin gzhal bar dka' ba 'di/ /theg dka'i dogs pas nor 'dzin khyon/ /rnam pa drug tu 'dar ba snyam/ /e ma mgon khyod yon tan la/ /tshad bzung nus pa lta ci smos/ /slob ma nyid slob bcas pa yi/ /ngo mtshara'ang tshangs blos gzhal mi nus// //spyi don drug pa sdom pa gsum la gces spras su mdzad cing nyams rtogs ji ltar 'khrungs pa'i tshul bye brag tu bshad pa ni/ snyigs dus kyi thams cad mkhyen pa 'jam pa'i dbyangs mkhyen brtse'i dbang po'i zhal snga nas mdzad pa'i rnam thar gsol 'debs las/ brtan mkhas tshul khrims dri yis phyogs kun khyab/ /gzhan phan byang chub sems gnyis gting nas 'byongs/ /tha mal 'khrul snang lha dang ye shes su/ /yongs shar grub pa'i dbang por gsol ba 'debs/ /brtse chen brnyes pa bzang po'i ring lugs la/ /gzhan dring mi 'jog shes nas dad thob bzhin/ /ris med bstan la dag pa'i snang ba yis/ /bsngags pa'i me tog 'thor la gsol ba 'debs/ /rab 'byams lhag pa'i lha yis rjes bzung zhing / /ji lta ji snyed shes bya kun mkhyen kyang / /yon tan sbas pa'i ngang tshul lhur mdzad phyir/ /rnam thar bsam mi khyab la gsol ba 'debs/ /zhes gsungs pa ltar bdag cag gi dpal ldan bla ma dam pa 'dis ni bstan pa'i snying po sde snod gsum gyi nyams su blang bya bslab pa rin po che rnams