[A:312]tshes nyer brgyad nas bzung ste/ thog mar mgul cham zhig gis nyen bslangs pa lta bus skyigs bu nyin mtshan bar ma chad par mdzad 'dug cing / de dang lhan cig sku mtshal dang chab chu bsdongs te shin tu sku khams bsnyel ba'i tshul bstan cing / de la brten nas sman pa rnams kyis kyang gsol sman sgo gang zab nas phul ba dang / zhabs brtan kyang e wa~M pa'i gtsug lag khang du 'dus tshogs kyis snga phyir tshe chog lan gsum tsam dang / gzhan yang zhabs brtan gyi rigs rgya gang che lta bu bsgrubs rung / sku khams dwangs skyed kyi tshul cher mi bzhes par snang bas da lan ji 'drar 'gyur snyam pa'i thams cad kyi blo bag mi phebs pa lta bur gyur rung / hor zla lnga pa'i gral tshes bco lnga'i nyin bdag cag dge slong bco lnga skor gyis bcom ldan 'das tshe dpag tu med pa'i cho ga dang 'brel bar sku tshe brtan bzhugs kyi gsol 'debs bgyis pas/ de nyin rje rang yang thugs dgyes pa'i rnam pa mdzad cing / thams cad kyis mthong snang mthun par sku'i zhal mdangs dus rgyun bas legs shing zil che ba lta bur snang bas/ re zhig zhabs pad brtan par gsol ba thebs pa 'dra snyam pa'i thams cad blo bde ba ltar gyur par ma zad/ don la'ang bdag sogs gdul bya mgon med pa dang / skyabs med pa dang / dpung gnyen med pa rnams la thugs brtse bar dgongs te/ rim gyis sku khams je dwangs kyi tshul bzhes te dgung grangs gya bdun du phebs pa chu khyi hor zla dang po'i nang bar spyir sku na smin pa'i stobs kyis sku gzugs babs lci ba dang / gsol chas la dwang ga cher mi snang ba ma gtogs de las gzhan pa'i snyun gzhi che rigs ci'ang med par zhabs pad brtan par bzhugs pa ni nges par sku tshe byin gyis brlabs par gor ma chag