[A:322]bka' stsal byung ba ltar gus phran nas kyang de bzhin du bgyis pa dang / de nas sde srid sangs rgyas rgya mtshos mdzad pa'i bai dkar gyi dris lan 'khrul snang g.ya' sel zhes sde dge'i spar ma pod gnyis yod pa de khyer shog gsungs pa ltar phul bas/ de'i nang du cig 'tshol bar mdzad kyin 'dug pa la bdag gis btsal na zhus par/ 'o na pod dang po de'i ldeb nyis brgya bcu drug bcu bdun skor zhig tu yod snyam pas de longs gsungs pa ltar blangs pas/ de na 'byung ba rags pa thim tshul dang / phra ba snang mched thob gsum la sogs pa'i bshad pa 'dra 'dug pas de la zhib par gzigs song ba dang / de nub kyang sku khams skyon med tsam du snang zhing / de'i phyi nyin tshes bco lngar yang sku khams de mus su mchis pa dang / de ring tshes bco lnga yin pas sangs rgyas kyi 'phel gdung zhig gsol dgos tshul gsungs pa ltar phul pas thugs smon dang bcas te gsol song ba dang / gzhan yang thog mar sku bsnyun pa'i tshul bstan pa nas bzung ste dus thams cad du thugs rig cung zad re 'thibs par gyur pa na/ de 'phral res 'ga' yi dam la gtor ma 'bul tshul dang / res 'ga' ma rgyud pa'i lugs kyi tsham rngams sngags kyis bsrung ba'i tshul la sogs pa'i phyag rgya 'dra rtag tu mdzad 'dug pa dang / bco lnga'i nub mo sku khams kyang je lcir song ba dang / da nged 'di ltar sdod pa yin gsungs shing zhabs skyil krung dang / sku gzugs drang por bsrangs te bzhugs song ba dang / gsol chas kyi rigs la dwang ga gtan nas ma mchis na'ang / bdag cag rnams kyi blos mi bzod pa lta bu'i gsol ja dang bzhes 'jam 'dra bteg kyang / da nged ting nge 'dzin bsgom pa la bsam gtan gyi zas bza' ba yin mod/ kha zas kyis dgos pa med lta bu gsal por rang