[A:324]pa chu khyi hor zla gsum pa nyis brtsegs kyi gsum pa snga ma'i tshes bcu bdun res gza' lhag pa dang / skar ma sa ri 'dzom pa'i nyi dros sbrul gyi steng du gzugs sku'i bkod pa chos kyi dbyings su bsdus shing / nyi zla'i rlung dang byang sems kyi stobs thams cad rtsa a ba dhU ti'i nang du bsdus te rnam kun mchog ldan gyi stong pa nyid dang / mchog tu mi 'gyur ba'i bde ba chen po zung du 'jug pa'i 'od gsal phyag rgya chen po'i ngang du mnyam par bzhag pa'i tshul bstan par gyur to/ /de'i tshe nam mkha'i phyogs bzhi nas sprin dkar po snam bu brkyangs pa lta bu bzhi nar gyis byung ste rje 'di'i gzim chung gi steng ngos kyi nam mkhar 'dus shing / de nas phyogs thams cad nas sprin mchod pa'i gzugs brnyan can mang po nang du 'du ba zhig 'dug ces grwa pa kha cig gis zer ba dang / yang grwa pa kha shas kyis ni 'ja' kha dog lnga ldan rtsa ba gcig pa lhor bstan cing / rtse mo mang por gyes pa byang ngos su bstan pa zhig shar song zer ba dang / yang bya bral ba kha cig gis ni 'ja' kha dog lnga ldan ring thung gsum shar song zer zhing / bdag cag gis zur tsam mthong ba la ni sprin mchod pa'i gzugs brnyan can mang po phyogs thams cad nas nang du lhags pa zhig ni nges par 'dug cing / gang ltar yang bdag cag rnams ni mas bu bor ba bzhin du sdug bsngal drag pos non par gyur rung / bla ma'i thugs rje la ni nye ring med pa dang / byin rlabs la 'du 'bral med pa kho na rgyu mtshan du byas nas rang gis rang la sems gso bgyi ba dang / rje rang la gsol ba rtse gcig tu 'debs pa las gzhan pa'i thabs zad cing / de ma thag nas bzung bdag cag dge slong bzhis thugs dam ma grol gyi bar du rje rang gis dus rgyun du gsungs pa'i yi dam gyi lha'i sgrub thabs rnams dang / gtor bsngo