[A:165]las sdom gsum dang 'gal ba'i/ /nyes byas phra mo'ang 'byung mi srid/ /e ma bsnyen par rdzogs pa yi/ /nor bu'i khri 'phang la 'khod pa'i/ /grags pa'i gdugs dkar g.yo ba des/ /srid pa'i rtse mo'i bar du khyab// //spyi don gsum pa zhugs pa'i rten des thos bsam sgom gsum ji ltar mdzad pa'i tshul ni/ bdag gi bla ma 'jam pa'i dbyangs mkhyen brtse'i dbang po'i zhal snga nas mdzad pa'i rje 'di'i rnam thar gsol 'debs byin rlabs bdud rtsi'i sprin mdzes las/ gzhan yang ris med dge ba'i bshes gnyen mchog /nyi shu rtsa bzhi gus pas nyer bsten nas/ /mang du thos dang bsam pa'i shes rab kyis/ /mkhas rnams dgyes pa bskyed der gsol ba 'debs/ /dam pas byin rlabs dben pa'i sgrub gnas su/ /thun mong lam gyi rim pas rgyud sbyangs nas/ /bskyed rdzogs rnal 'byor zab mos lhan skyes kyi/ /ye shes rgyas par mdzad la gsol ba 'debs/ /zhes gsungs pa ltar rgyal ba'i bstan pa la zhugs pa rnams kyi mngon par rtogs pa ni/ rgyal ba'i sras po ma pham pas mdo sde'i rgyan las/ 'di na dang por thos pa la brten tshul bzhin yid la byed pa 'byung / tshul bzhin yid la byed pa la yang yang dag don yul ye shes 'byung / zhes gsungs pa ltar tshogs lam gyi skabs su gzhung lugs rnams la thos bsam sgom gsum byas pa la brten nas/ de nyid goms pa'i tshul gyis bsam byung dang 'jig rten pa'i bsgoms byung gi shes rab sbyor lam nges 'byed cha mthun bzhi la rim gyis 'byung zhing / de la brten nas mthong lam sa dang po'i rtogs pa mngon du gyur pa'i tshe/ yang dag pa'i ye shes kyi cha shas tshes gcig zla ba lta bu mthong bar 'gyur la/ de nyid sgom lam gyi gnas skabs rnams su rim