[A:164]yang mi 'da' bar bzhugs pa yin no/ /gzhon nu nyid nas byang sems kyi/ /rlabs chen spyod pas 'khyud pa yi/ /snyan grags utpal dkar po'i phreng / /phyogs kyi bu mo'i rgyan du byin/ /de mthong skye bo phal mo che'i/ /ngag la dbyangs can zhugs pa bzhin/ /bstod pa'i rol mo 'bum 'khrol ba/ /dri za'i phang 'gro'i glu las snyan/ /shes bya nam mkha' dang mnyam pa/ /thugs chud 'chi med sar 'dzegs des/ /lung bstan gling bu bsgyur ba'i mod/ /phan bde'i 'dod pa 'grub la nye/ /gangs ljongs 'gro ba'i bsod nams kyi/ /rin chen rdul mang las grub pa'i/ /e wa~M chos kyi pho brang ni/ /sa la 'og min 'phos pa bzhin/ /rgyal ba las kyang rnyed dka' ba'i/ /gsang sngags chos kyi mdzod gyur pa/ /gang der son pa tsam gyis kyang / /'khor ba'i nad kun zhi bar byed/ /de lta'i longs spyod rdzogs zhing der/ /padma'i mtsho la ngang mo bzhin/ /zhugs pas srid pa hrul po ru/ /byed pa'i sta gon thog mar brtsams/ /gzod nas thams cad mkhyen zin kyang / /'gro 'di'i don slad yi ge nas/ /rgyud kyi rgyal po gnyis med bar/ /rnam dpyod blo yi mdzod du bcug /mthong ba tsam gyi chu klung gis/ /sgrib pa'i dri ma kun 'khrud pa/ /dpal ldan sa skya'i chos grwa che/ /dad pa'i spyan gyi bdud rtsir byas/ /khyad par srid pa'i bde ba la/ /chags pa'i mdud pa rab bkrol nas/ /rnam grol gling du bgrod pa'i phyir/ /so thar sdom pa'i shing rtar zhugs/ /yang cig theg chen sems bskyed kyi/ /sdom pa'i go cha rab gyon nas/ /byang chub sems kyi mtshon rnon pos/ /bdag tu 'dzin pa'i dgra tshogs bcom/ /des kyang blo gros ma tshim par/ /gsang sngags sdom pa'i rkang mgyogs kyis/ /bcu gsum rdo rje 'dzin pa'i sar/ /tshe 'dir bgrod pa'i mthu ldan byas/ /chu bo'i rgyun las me lce dang / /zla ba'i zer las dug bzhin du/ /khyod