[A:342]sogs pa'i bsnyen bkur shin tu bzang bar bgyis pa yin no/ /gzhan phyogs tha dad nas kyang mgon po gang gi thugs sras rnams kyis thugs kyi dgongs pa yongs su rdzogs pa'i slad du rnam par dkar ba'i sgo 'phar yangs por phyes pa'i tshul rnams ni re re nas smos kyis mi lang ngo / /mdor na bka' drin gyi cha shas phra mo tsam yang 'di nas byang chub bar du gzhal dka' ba'i bdag cag gi dpal ldan bla ma dam pa yon tan rin po che'i phung por gyur pa 'di'i phyogs su bdag cag rnams kyis lus longs spyod dus gsum du bsags pa'i dge ba'i rtsa ba dang bcas pa thams cad bskal pa'am bskal pa las lhag par nyin re bzhin 'bum phrag du mar btang yang chung ba'i skyon kho na las ma mchis mod/ re zhig bdag cag rnams kyi nus pa ni de tsam du zad do/ /de ltar bdag cag gi dpal ldan bla ma dam pa 'di ni don dam par bskal pa dpag tu med pa'i sngon rol nas skye 'chi'i spros pa thams cad yongs su spangs kyang / kun rdzob tu bdag lta bu'i gdul bya rtag 'dzin can rnams 'dul ba'i slad du/ gzugs sku'i bkod pa chos dbyings su bsdus pa'i tshul bstan par gyur mod/ 'on kyang 'khor ba ji srid gnas pa de srid du sprul pa sna tshogs pa'i sgo nas sems can gyi don rgyun chad med par 'bad med lhun grub kyi tshul du mdzad pa yin te/ spyod 'jug las/ yid bzhin nor bu dpag bsam shing / /ji ltar re ba yongs skong ba/ /de bzhin gdul byar smon lam gyi/ /dbang gis rgyal ba'i skur snang ngo / /zhes dang / rdo rje gur las/ gdul ba'i 'jig rten mthong nas ni/ /'di yi gzugs ni du mar byed/ /sangs rgyas sems can skyabs bzhed pas/ /sangs rgyas gar ni rol par mdzad/ /ces gsungs pa ltar ro/ /nyin byed nub rir nye ba na/ /grib ma'i tshogs rnams 'ong ba bzhin/ /mgon khyod zhing gzhan gshegs bzhed tshe/ /ltas rnams