[A:167]sa bla brang phun tshogs khang sar la rtsis gnang nas/ rje 'di dgung lo bcu dgur son pa shing stag lor khu bo mkhan chen dam pa mdo khams su bstan 'gro'i don la chibs bskyod bskyangs par brten/ de skor gyi thugs brel rnams bcad de rim gyis phyag dpe'i skor la gzigs rtog rgya cher bskyangs/ de skabs gong du byams pa nam mkha' 'chi med kyi rnam thar du gsal ba ltar e waM pa'i mkhan sa bla khag rnams res bskor gyis mdzad pas/ rje 'di dgung grangs nyer gcig tu son pa me pho 'brug gi lor e wa~M bla brang gzhung phan khang nas rtsis bzhes te/ bka' chos rnams mdo sngags smra ba'i khyu mchog ngag dbang bstan pa rin chen pas stsal ba rnams rje 'dis gsan par mdzad de/ de'ang sgrub thabs brgya rtsa nas byung ba'i lo gyon ma'i rjes gnang sngon du 'gro ba'i sgo nas/ mkhas pa'i dbang po ngag dbang brtan pa'i rdo rje'i yig steng nas/ 'phags yul gyi grub pa'i 'khor los sgyur ba 'jigs bral bi rU pa'i thugs bcud gsung ngag rin po che lam 'bras tshogs bshad du grags pa'i sngon 'gro snang ba gsum gyi khrid dang / de'i skabs kyi snga chos su e wa~M pa'i chos spyod dum bu gsum kha skong dang bcas pa'i lung / de rjes brgyud pa'i khyad par gnyis ldan gyi sems bskyed/ de nas slob ma rjes 'dzin sogs dbang gi mngon par rtogs pa brgyad dang ldan pa'i sgo nas dpal kye rdo rje man ngag lugs kyi rdul tshon gyi dkyil 'khor chen por bcug ste dbang bzhi rdzogs par bskur ba dang / de nas lam gyi dngos gzhi rgyud gsum gyi khrid la/ thog mar lta bas spros pa gcod pa'i phyir kun gzhi rgyu rgyud la 'khor 'das dbyer med kyi lta ba bsgom pa/ bar du lam gyi nyams bskyed pa'i phyir lus thabs rgyud la dbang bzhi dang rjes su 'brel ba'i lam gyi nang