[A:154]sems can gsod pa'i gtam thos pa tsam gyis mig nas mchi ma rang dbang med par shor zhing / nyin grangs mang po'i bar du zas la dwang ga 'gags 'gro ba zhig yod pa yin/ de la brten nas byis pa gzhan rnams kyis rtsed mo'i phyir du 'bu dang sbrang ma la sogs pa gsod par byed kyang / nged nas de 'dra bsad pa ye mi dran/ 'di la bltas nas tshe snga ma'ang ston mchog shAkya'i rgyal po'i bstan pa rin po che'i sgor zhugs nas byang chub sems dpa'i sdom pa la goms 'dris cung zad byas pa 'dra zhes bka' stsal pa bdag nyid kyis thos la/ gzhan yang bla ma dang sangs rgyas byang chub sems dpa'i sku gzugs 'jim pa las grub pa sogs rnyed tshad bsdus te gnas dben par stegs gtsang ma'i steng du bzhugs su gsol zhing / de la mgron bu la sogs pa'i dngos po byung tshad thams cad 'bul ba dang / dar gos rnyed tshad kyi na bza' gsol ba dang / phyag dang yon chab 'bul ba la sogs pa chos dang mthun pa'i bya ba 'ba' zhig gis dus 'da' bar mdzad pa dang / mngon par rtogs pa rgyan las/ gos la sogs pa gtsang ba dang / /lus la srin bu rnams mi 'byung / /zhes sbyor lam rtse mo la gnas pa'i rtags su bshad pa dang mthun par gtsang sbra che zhing / sku lus la srin bu med pa sogs dam pa'i yon tan du ma dang ldan zhing / rgan pa la gus pa dang / gzhon pa la byams pa sogs ya rabs kyi spyod pa dang ldan pas skye rgu thams cad shin tu ngo mtshar ba'i gnas la bkod par gyur to zhes thos so/ /skabs shig bar chad kyi rnam pas yul der gzhung gi rnga mo mgo ba sleb pa na/ byis pa thams cad ri bong cal rgyug gi tshul du rnga mo sleb yong zhes sgrogs shing phyogs thams cad du bros pa na/ rje 'dis kyang de bzhin du mdzad pas/ khang pa thog tshad gcig tsam gyi g.yang du sku lhung ba'i rkyen gyis snyan gyi dbang por