[A:153]te bde bar sku bltams par gyur to/ /de ltar bltams pa'i khye'u de ni gzugs mdzes shing lta na sdug la brjid chags pa/ ston ka'i zla ba dri ma med pa ltar kha dog dkar zhing snum pa skyes bu chen po'i mtshan dang ldan pas skye bo mtha' dag gi yid kyi brtan pa dbang med du 'phrog pa zhig yod la/ yab yum rnams kyis mtshan padma rdo rje zhes bya bar gsol to/ /de lta bu'i gzhon nu de ni bskal pa dpag tu med pa nas byang chub sems dpa'i spyod pa rlabs po che la goms pa brtas pa'i shugs kyis gsung sgros smra mi mkhyen pa'i dus su'ang ma Ni sgra dag par rtag tu gsung ba dang / dgung grangs bzhi lnga tsam bzhes pa'i tshe/ yab yum gyi mdzo mo zhig brlag pa ji tsam btsal kyang ma rnyed pa la/ rje 'dis phyag mdzub gtad de ri pha ki'i rgyab na yod gsungs pa bzhin du rnyed pa sogs mngon shes kyang gsal bar mnga' ba dang / khyad par du yang mgon po byams pas/ sbyor ba'i sngon du snying rje dang / /mos pa dang ni bzod pa dang / /dge ba yang dag spyod pa ni/ /rigs kyi rtags su shes par bya/ /zhes gsungs pa ltar theg pa chen po'i rigs sad pa'i stobs kyis nye ring med pa'i sems can thams cad la tshad med pa'i snying rje mnga' zhing / mgon med pa dang / skyabs med pa dang / dpung gnyen med pa'i 'gro ba nyam thag pa gzigs pa'am gsan pa'i tshe rang dbang med par spyan chab ldang ba dang / sems can gsod pa sogs kyi gtam gsan pa'am/ yang na de dag gi sha khrag sogs gzigs pa'i tshe mi bzod pa'i snying rje shugs drag po skyes pa'i stobs kyis spyan chab lhung zhing / nyin grangs mang po'i bar du gsol chas kyi dwang ga'ang 'gags 'gro ba zhig yod pa yin te/ nges pa don gyi rdo rje 'chang chen po 'di'i zhal snga nas/ nged na so shin tu phra ba'i skabs su'ang