[A:228]lnga bcu rtsa gcig gi bka' dbang sogs dgos tshul phebs pa bzhin/ gdung sras kyang mi ring bar 'byon pa'i lung bstan dang / bka' dbang rnams thugs bzhed bzhin phul bas khri chen rin po che'ang thugs dgyes pa'i rtser son te sangs rgyas dngos kyi 'du shes kyis rje 'di'i zhabs pad bskal brgyar brtan pa'i gsol 'debs phul ba dang / khyad par mdo khams su'ang rje 'di lta bu la zhabs tog mi sgrub pa dang / 'gal rkyen du 'gro rigs zhu mi su'ang mi 'byung ba gzhir bcas na'ang / de dag la phan pa'i phyir yin gsungs nas bka' shog cig kyang stsal ba sogs bkur sti bla na med pa mdzad do/ /gdung sras kyang ji ltar lung bstan pa bzhin du yun ha cang mi ring ba na 'jam dpal gzhon nu bkra shis rin chen ngo mtshar ba'i ltas dang bcas te 'khrungs pa yin zhes thos so/ /gang ltar yang 'jam mgon sku ngo rnams las chos 'brel re'ang gsan te hor zla gnyis pa'i mjug tu e wa~M du phebs/ sku'i rkyen sel du mgon khang khag rnams su skong ba dang / yul lhar bsang mchod la sogs pa skabs su bab pa'i rim gro rnams kyang bsgrub pa dang / der bzhugs kyi bla grwa kun la chos dang mthun pa'i mdzad sgo gong 'phel dgos pa'i zhal ta sogs stsal te/ dgung lo zhe bdun pa sna tshogs zhes pa chu pho rta'i lo'i sa ga zla ba'i dkar phyogs kyi gral tshes bcu'i nyin spyi dang bye brag gi chibs skyel gyi tshogs rab tu mang po dang bcas te e wa~M chos ldan nas chibs kyi gdong bsgyur/ mar lam chos grwa chen po bkra shis lhun por phebs/ paN chen thams cad mkhyen pa rje btsun blo bzang dpal ldan bstan pa'i nyi mar dngos 'bul 'ga' zhig dang bcas te mjal phyag zhu ba dang / lha khang khag rnams su mchod 'bul dang thugs smon sogs zhib par mdzad de rim gyis lha ldan