[A:230]chibs kyi kha lo bsgyur ba na/ rje 'di'i mnal lam phal che bar mi dkar po zhig gis dga' ba dang gus pa'i rnam 'gyur du ma byed cing / res rje 'di'i phyag nas brten/ res chibs pa khrid de sde dge lhun grub steng gi rgyal khab dang nye ba'i sa ko ko la nas mar byon pa'i snang ba rtag tu byung zhing / de ni sde dge'i gzhi bdag 'bri gnyen gdong gis thog ma'i bsu ba dang / slad nas phrin las 'ga' zhig kyang sgrub pa'i ltas yin pa 'dra gsungs/ lam bar du 'khod pa'i 'gro ba rnams la'ang chos kyi bdud rtsi cung zad stsol bzhin pa'i sgo nas rim gyis bod chen po'i ljongs su phebs par gyur to/ /'di ni byang chub sems dpa' chen po rnams kyi rnam par thar pa yin te/ bcom ldan 'das kyis mdo sde dag las/ byang chub sems dpa' ni dpag tshad brgya'i pha rol dag tu'ang sems can rnams la chos ston du 'gro zhes gsungs pa'i phyir ro/ /de nas sde dge chos rgyal chen pos snga phyir phebs bsu'i bkod pa rab tu mang pos mdun nas bsus shing / khyad par dpal ldan lhun grub steng gi chos grwa chen por bzhugs pa'i dge 'dun yod do cog gis ser sbreng gi bkod pa tshar du dngar ba/ ji ltar li khri'i chu gter dal gyis bskyod pa la dbang gzhu'i ri mos mdzes par 'khyud pas skye bo rnams kyi yid kyi brtan pa cig car du 'phrogs pas kyang dper bya bar mi bzod pa'i ngo mtshar gyi ltad mo gsar du ngoms bzhin pa'i bsu ba'i tshogs dang bcas te/ gro bzhin gyi zla ba'i dkar phyogs kyi gral tshes bcu gnyis kyi nyin/ mdo khams zal mo sgang gi sa'i thig le sde bzhi dang dge bcu'i dpal 'byor phun sum tshogs pas yongs su gtams pa'i rgyal khab chen po mi mthun pa'i phyogs thams cad las rnam par rgyal ba ga la ba der/ nye zho'i dri ma med pa bde bar phebs