[A:155]cung zad skyon shor ba lta bus de phyin chad snyan gyis cher mi gsan par gyur pa yin zhes thos la/ de dag ni shin tu snyigs ma'i dus 'dir dkar phyogs rnams pham/ nag phyogs rnams rgyal ba'i skabs su song gshis bdud kyi rigs kyis bar chad byed par brtsams kyang / rje 'di ni bskal pa dpag tu med pa nas gzhan la sman pa'i thugs bskyed kyi g.yar dam brtan pa'i stobs kyis snyan la skyon cung zad byung ba tsam las/ gzhan pa'i bar chad kyis glags ma rnyed par sems so/ /dgung lo lnga pa kun ldan gyi lor bdag chen 'jam pa'i dbyangs ngag dbang kun dga' blo gros yab sras rnams dbus phebs mdzad pa'i yar lam ngor du phebs/ dgon pa'i phyi rol du tshe dbang zhig stsal ba rje 'di yab yum dang bcas pa gsan du byon pas sku tshe la mnga' brnyes pa'i rten 'brel gyi thog ma'ang 'di dus nas 'grig par mngon no/ /rgyal rnams dgongs pa'i snying po ni/ /'gro kun srid las sgrol ba ste/ /nyi zla'i 'od kyi byed las kyang / /mun pa'i smag rum kho na sel/ /de slad sprul pa sna tshogs kyis/ /'gro ba'i re 'dod skong ba ni/ /dpag bsam shing dang bum pa bzang / /bsam 'phel nor bus mtshon ma gyur/ /khyad par bsil ldan ljongs kyi 'gro/ /thar pa'i grong du dbugs dbyung slad/ /skyob pa rnams kyi ye shes kyang / /mtshan dpe'i gzugs su sprul la chas/ /e ma dge mtshan rgya mtsho yis/ /mdzes par 'khyud pa'i gling 'di ni/ /sprul pa'i sku de 'khrungs yul du/ /byed pos gsar du bskrun min nam/ /shin tu ngo mtshar ltas rnams kyis/ /yongs su bskor te smin legs ma'i/ /lus kyi gzhal med khang pa ru/ /'jug pa'i dus ston gsar pa shar/ /'phags rnams dman pa'i lto ba na/ /gzhar yang gnas pa ma yin te/ /seng ge'i 'o ma rin chen las/ /gzhan pa'i snod du