[A:156]chags nus sam/ /de phyir mi yi cha byad las/ /rab 'das lha mo'i dpal 'dzin ma/ /bzhin bzang ma khyod rgyal ba'i sras/ /bskyed phyir 'phags ma'i sprul par nges/ /de nas dus la bab pa na/ /mdzes pa'i cha shas kun rdzogs shing / /snang bas mun 'phrog gdung sel zla/ /'gro 'di'i bsod nams skal bas rnyed/ /rab mdzes me tog padma dkar/ /mtshan dang dpe byad kyis spras shing / /chos kyi bag chags dang ldan na/ /gzhon nu 'di yi dpe zlar 'os/ /rgyal la bsnyen bsrid mi mnga' yang / /gangs ljongs lha ni 'di'o zhes/ /ston phyir gsung gi thog ma ru/ /yi ge drug pa dbyangs su len/ /bskal pa dpag tu med pa nas/ /tshogs gnyis rdzogs pa'i mthar son kyang / /da dung rgyal ba'i sku brnyan la/ /mchod pa'i ltad mo ci yang ston/ /sgrib gnyis g.ya' yis ma gos pa'i/ /ye shes me long dag pa'i ngos/ /shes bya'i gzugs kun shar ba la/ /mngon par shes pa'i grags pa dkar/ /rang gi ma la su yang brtse/ /'byor ldan rnams la kun kyang dga'/ /rgyal po la ni thams cad btud/ /dman la byams pa khyod kho na/ /na tshod phra mo'i dus 'dir yang / /mgon med rnams kyi mgon gyur na/ /da gzod dar la babs pa'i tshe/ /kun gyi skyabs su 'gyur bar nges/ /khyod ni ris med lus can la/ /phan bde'i bdud rtsi rab stsol yang / /yid srubs dpung dang bcas pa yi/ /snying la mya ngan zug rngu sbyin/ /de slad bar du gcod brtsams kyang / /glags rnyed 'gyur ba ga la nus/ /de bas 'di la skyabs song na/ /khyed rnams bde la 'god par nges/ /brtan par btsugs so 'jam pa'i dbyangs/ /'chi med mgon po'i skur bzhengs te/ /gzhon nu'i tshe yi ka ba ni/ /'gyur du med pa'i rang bzhin du'o// //spyi don gnyis pa rgyal ba'i bstan pa rin po che'i sgor