[A:240]skye bo ngan pa'i spyod tshul thams cad rgyang ring du dor nas/ dad pa can gyis phul ba'i yo byad kyi dngos po phyag tu byung ba thams cad chud zos su ma song bar sku gsung thugs kyi rten bzhengs pa dang / bla ma dang dkon mchog dang bstan pa dang sems can gyi ched kho nar phangs med du gtong bar mdzad pa yin te/ de'ang snga phyir sku gsung thugs kyi rten bzhengs pa la'ang / bcom ldan 'das kun rig rnam par snang mdzad dang / gtsug tor rnam par rgyal ma dang rigs gsum mgon po bcas kyi sku so sor mda' tshad re lhag tsam yod pa/ rgyu gser zangs las grub pa/ shin tu sgros gtsang zhing phyags tshad dang ldan pa/ rin thang che ba'i rin po che mang po'i phras mdzes par spud pa sogs lta bas chog mi shes pa lnga dang / yang gser zangs las grub pa'i jo bo'i sku rgyab yol dang bcas par mda' tshad tsam yod pa shin tu sgros legs pa gcig dang / gser zangs las grub pa'i byang chub sems dpa' nye ba'i sras brgyad kyi sku so sor khru gang re tsam yod pa brgyad dang / yum chen mo dang / 'jam dpal smra seng dang / seng ge sgra la sogs pa'i sku gser zangs las grub pa so sor khru gang tsam yod pa shin tu sgros legs pa kha shas dang / gser zangs las grub pa'i kun rig rtsa ba'i lha sum cu so bdun so sor che chung gi tshad mtho gang re tsam yod pa dang / gser zangs las grub pa'i sman bla mched bdun gyi sku so sor mtho gang tsam re yod pa sogs mdor na gzhan la gtan gzhag stsal ba dang / rang gi phyag tu bzhugs pa thams cad bsdoms na gsar du bzhengs nges pa'i gser zangs kyi sku kho na'ang brgya phrag gcig tsam yod pa dang / dngul ljang brdungs kyi sgrol ljang khru gang tsam gcig dang / zangs kyi rnam rgyal ma mda' tshad tsam yod pa bcas kyang gsar du bzhengs pa dang /