[A:239]bral zhing / /thub bstan dga' ston dar bar gyur/ /gzod ma nyid nas khams gsum gyi/ /chos kyi rgyal por mnga' brnyes kyang / /tshu rol mthong 'dis bod chen gyi/ /bstan 'gro'i mgon du mnga' rab gsol/ /sreg byed me yis tshig min cing / /chu bo'i rgyun gyis mi 'dag pa'i/ /'gro ba'i las nyon dri ma kun/ /khyod kyi thugs rje'i chu yis bkrus/ /zab rgyas chos kyi sman chen pos/ /'khor ba'i rims nad sel kho nas/ thub dbang rjes su bsngags min te/ /grol ba bzhi ldan 'dis kyang ngo / /de lta'i ngo mtshar mi zad pa/ /nyin bzhin 'phel bar gyur pa 'di/ /'degs par bzod pa'i nor 'dzin ma/ /dub par ma gyur 'di ci zhig/ //gnyis pa tshogs gnyis rgya cher spel ba'i slad du dbus gtsang dag pa'i zhing du bsnyen bkur ji ltar bstabs pa'i tshul ni/ spyir rje 'di ni mkhas btsun bzang gsum gyi yon tan bsam gyis mi khyab pa la dbang 'byor zhing / rnam par dkar ba'i phrin las kyis skye rgu mtha' dag phan pa dang bde ba'i lam du bkod pa la brten nas bod chen po'i ljongs su 'khod pa'i skye 'gro mchog dman thams cad kyi gtsug gi nor bus btud cing / rang rang gi 'byor pa'i khyad par mang pos mngon par mchod par gyur la/ de la brten nas zang zing gi longs spyod kyang rdzogs ldan gyi dus bzhin du rgyas par gyur mod/ rgyags pa dang dregs pa lta ci/ mngon par zhen pa cung zad kyang mi mnga'/ der ma zad rang nyid bzang por bsgrub pa'i ched du dgos med kyi thabs skyong dang / rnyed pas rnyed pa 'tshol ba dang / rab tu byung ba'i yo byad kyis khyim pa rnams kyi sems 'dzin pa la sogs pa log pa'i 'tsho ba dang / ma dag pa'i sbyin pas rang gzhan thams cad nyes dmigs chen po la sbyor ba sogs