[A:157]zhugs nas rgyud sdom pa gsum ldan du mdzad pa'i tshul ni/ rtsod dus kyi thams cad mkhyen pa 'jam pa'i dbyangs mkhyen brtse'i dbang po'i zhal snga nas mdzad pa'i rje 'di'i rnam thar gsol 'debs byin rlabs bdud rtsi'i sprin mdzes zhes bya ba las/ rdo rje 'chang dngos nam mkha'i mtshan can las/ /sdom pa gsum gyi bka' drin legs nos shing / /zab rgyas sde snod rgyud sde rgya mtsho yi/ /smin grol lam bzang gsan la gsol ba 'debs/ /zhes gsungs shing / de'ang 'di ltar rjes su thos te/ bdag cag gi dpal ldan bla ma dam pa gzhal du med pa'i yon tan du ma la dbang bsgyur ba 'di ni gzhon nu'i dus nas chos kyi bag chags shin tu mthug pa'i stobs kyis/ skye bo phal che bas kyang nges par bstan pa 'dzin pa'i khyu mchog chen po nyid du 'gyur bar gdon mi za bar sems la/ khyad par mkhan chen rdo rje 'chang byams pa nam mkha' 'chi med kyi zhal snga nas/ gzhon nu 'di chos byas na nges par bstan pa la phan thogs shin tu che bar 'ong ba'i bka' mchid dbyangs kyi rgyal mo'i rgyud mangs nas drangs pa lta bu rna ba'i bcud du stsal bas rkyen byas te/ dgung lo drug pa lcags mo glang gi lor/ dper na skyes bu skom pas gdung ba 'ga' zhig shin tu gtsang zhing bsil ba'i chu rgyun yid la byed cing 'gro ba bzhin du/ yab dang lhan cig snga na med pa'i dga' ba dang spro ba'i 'dzum rlabs gsar pa khong nas dgod bzhin pa'i ngang nas yon tan rin po che du ma'i 'byung gnas dpal e wa~M chos ldan gyi bla brang thar pa rtser phebs/ de'i tshe gzhan dag gis gser zangs kyi ganydzir dang / rgyal mtshan rnams bstan te 'di rnams ci yin zhes dris pa na/ sngon nas gsan ma myong yang 'di dag ni gser zangs las grub pa'i ganydzi ra dang / rgyal mtshan no gsungs pas/ thams cad kyis na tshod phra mo 'di lta bus 'di 'dra shes pa