[A:༤༩༩]བཏབ་སྟེ་སྟ་གོན་བྱ་བ་སོགས་རྗེ་བཙུན་རིན་པོ་ཆེས་དུས་ཐའི་ཆོ་ག་ལས་ཇི་ལྟར་བཤད་པ་བཞིན་བགྱིས་པ་དང༌། དུས་ཐའི་ཆོ་ག་དངོས་ཀྱང་གང་ཟག་མཆོག་ལ་བྱ་བའི་ཚུལ་ཇི་ལྟར་བཤད་པ་ལྟར་ཐོག་མར་བདུན་ཕྲག་གཉིས་ཀྱི་བར་ལ་སྐུ་གདུང་རིན་པོ་ཆེ་རྣམ་པར་སྣང་མཛད་ཀྱེ་རྡོ་རྗེར་བསྐྱེད་ཅིང༌། ཡེ་ཤེས་པ་གཞུག་པ་སོགས་བགྱིས་པ་དང༌། དབང་བསྐུར་བ་ནི་རྗེ་བཙུན་རིན་པོ་ཆེས་གཞན་ཕན་བདུད་རྩི་ལས། བླ་མའམ་གང་ཟག་མཆོག་ལ་བྱེད་ན། དབང་ལ་སོགས་པ་ལེན་མཁན་ནི་གང་ཟག་མཆོག་དེ་ཡིན་ལ། དབང་སྐུར་མཁན་དེ་ནི་དཀྱིལ་འཁོར་གྱི་འཁོར་ལོ་ལ་སོགས་པ་སངས་རྒྱས་དང༌། བྱང་ཆུབ་སེམས་དཔའི་ཚོགས་རྣམས་ཡིན་ཞིང༌། བདག་གིས་བླ་མའི་ཞབས་ཏོག་བྱེད་པར་དམིགས་ན་བསོད་ནམས་མཆོག་ཏུ་འགྱུར་གྱི། གཞན་དུ་ན་བདག་སློབ་དཔོན་ལྟ་བུར་བསྒོམས་ན་ནི་བདག་ཉིད་ལ་ཉེས་པར་འགྱུར་རོ། །དེས་ན་བདག་གཡོག་གམ། ཞབས་ཏོག་བྱེད་པར་བསམ་པ་གལ་ཆེའོ། །ཞེས་བཀའ་སྩལ་པ་ལྟར་དཀྱིལ་འཁོར་གྱི་གཙོ་བོས་དབང་རྣམས་ཕུལ་བར་བསམས་ཏེ། དབང་ཚིག་རྣམས་བདག་གིས་བརྗོད་པ་དང༌། མཎྜལ་འབུལ་བ་དང༌། དབང་རྫས་འབུལ་བ་སོགས་ལས་ཀྱི་རྡོ་རྗེའི་བྱ་བ་ཐམས་ཅད་བདག་གིས་བགྱིས་ཏེ། མདོར་ན་བདུན་ཕྲག་གཉིས་ཀྱི་བར་ལ་དུས་ཐའི་ཆོ་ག་དབང་དང་བཅས་པའི་ཞབས་ཏོག་བགྱིས་པ་དང༌། བདུན་གསུམ་པ་མན་ཆད་ལ་དུས་ཐའི་ཆོ་ག་དང༌། དབང་སོགས་ཀྱི་སྤྲོས་པ་ཅིའང་མ་བྱས་པར་བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་དུ་དམིགས་ཏེ་བདག་ཉིད་འཇུག་ཅིང་དབང་བླང་བ་ཁོ་ན་བགྱིས་པ་ཡིན་ལ། བདུན་ཕྲག་བདུན་པའི་དཀྱིལ་འཁོར་གཤེགས་གསོལ་གྱི་ཉིན་དཔལ་བོའི་སྟོན་མོའམ་ཚོགས་འཁོར་དུ་གྲགས་པ་དང༌། རྡུལ་ཚོན་ཆུ་བོར་སྤྱན་འདྲེན་པ་དང༌། གཏོར་འབུལ་ལ་སོགས་པ་ཆོ་ག་མཐའ་རྒྱས་ཀྱི་ཚུལ་དུ་བགྱིས་པ་དང༌། དེའང་