[A:457]lo srang nyer lnga re/ bzang ja 'khor drug bco lnga re/ rta drel gsum bcas phul ba dang / thar rtse rang du'ang rigs dang dkyil 'khor rgya mtsho'i khyab bdag gcen mkhan chen rdo rje 'chang byams pa kun dga' bstan 'dzin gyi drung du maNDal sku gsung thugs rten gyi gtsos 'bul ba shin tu stobs che ba dang / gzim phrug khang mkhan rin po che lung rig smra ba'i dbang phyug dpal ldan chos kyi rgyal mtshan pa dang / khang ser dpon slob rin po che 'jam dbyangs grags pa dang / dpon slob thams cad mkhyen pa 'jam pa'i dbyangs ngag dbang legs grub pa dang / dpon slob las thog pa ngag dbang dge legs pa ste de dag so so'i mdun du'ang 'bul ba gang zab re dang / khang tshan bcu gcig po thams cad la'ang so sor thob khungs dang / khang tshan che chung gi babs la gzhig pa'i ja sar dang / khyad par rang rang gi skong brgya tshogs pa'i skabs 'phar ja'i bsnyen bkur dang 'brel bar gtan gzhag zab pa re stsal ba dang / dgon pa'i chos khrims dang / bla khag so so'i phyag gnyer las tshan gyi rigs dang / thar rtse rang gi las tshan dang / grwa tshang dang / lto zan gyi rigs dang / ngor pa'i chos gzhis mi ser sogs la'ang ja sar dang gnang sbyin skabs su gang bab re stsal te/ zla ba de'i mjug tu ji ltar sum rtsen gyi yul na gnas pa'i rnam par rgyal ba'i pho brang blta bas chog mi shes pa nyid mi'i yul du 'phos pa snyam byed pa'am/ rnam pa gcig tu na bskal pa bzang po 'di'i rnam par 'dren pa thams cad mngon par byang chub pa'i gnas 'phags yul rdo rje gdan dang khyad par cung zad kyang dmigs su med pa'i yon tan rin po che du ma'i 'byung gnas dpal sa skya'i chos grwa chen por phebs/ thog mar khri chen thams cad mkhyen pa ngag dbang