[A:461]gros kyi mdun du ljags bsngo rin po ches rjes 'dzin zhu mtshon gyi 'bul ba shin tu zab pa dang / spyir bla brang gzhung gi 'bul ba khang sar mkhan rnying rin po cher phul zin rung / phan khang mkhan gsar rin po che'i drung du'ang sa bcad stong min tsam du bzang ja 'khor drug bzhi dang / rgya rol che legs la sogs pa'i dngos po 'ga' zhig kyang 'bul bar mdzad pa dang / gzhan yang zhwa lu ri phug tu rtsod pa'i dus kyi kun mkhyen bu ston gnyis pa rdo rje 'chang rin chen blo gsal bstan skyong dpal bzang po'i drung du'ang dngos rdzas 'ga' zhig phul ba dang / zhwa lu chos sde dang / snar thang / srad rgyud pa/ srad dgon khra sogs nye skor gyi dgon khag rnams su'ang mang ja'i bsnyen bkur stsal ba sogs mdor na rmad du byung ba'i mchod pa'i sprin phung 'dzad pa med par spros pa'i tshul 'di lta bu ni/ byang chub sems dpa' sems dpa' chen po kun tu bzang po'i rnam par thar pa kho na dang mtshungs par 'gyur gyi/ de las gzhan pa'i so so skye bo gtong phod che bar rlom pa mang po phyogs gcig tu bsdoms kyang gang gi cha shas re yang bskrun tu yod pa'i re ba ni padma'i rtsa ba ltar shin tu phra ba'o zhes dge ba'i phyogs kyi zla 'od gzhon nus yid kyi ku mu dA yongs su kha phyes pa'i skyes bu gzu bor gnas pa rnams kyis mgrin gcig tu snyan ngag dam pa'i glu bzhin du len par byed do/ /de nas bzung ste e wa~M rang du bzhugs nas gtso bor thugs dam kho na la gzhol bar mdzad cing / bka' chos kyi rim pa'ang dgur grangs re gsum du phebs pa lcags mo phag gi lor sde dge bla chen byams pa kun dga' 'jam dpal phan bde'i snying po dpon 'khor rnams e wa~M du phebs te/ des gsol ba btab pa'i ngor grub chen bi rU pa'i thugs bcud gangs can bstan pa'i mnga' bdag rje btsun sa