[A:༤༦༡]གྲོས་ཀྱི་མདུན་དུ་ལྗགས་བསྔོ་རིན་པོ་ཆེས་རྗེས་འཛིན་ཞུ་མཚོན་གྱི་འབུལ་བ་ཤིན་ཏུ་ཟབ་པ་དང༌། སྤྱིར་བླ་བྲང་གཞུང་གི་འབུལ་བ་ཁང་སར་མཁན་རྙིང་རིན་པོ་ཆེར་ཕུལ་ཟིན་རུང༌། ཕན་ཁང་མཁན་གསར་རིན་པོ་ཆེའི་དྲུང་དུའང་ས་བཅད་སྟོང་མིན་ཙམ་དུ་བཟང་ཇ་འཁོར་དྲུག་བཞི་དང༌། རྒྱ་རོལ་ཆེ་ལེགས་ལ་སོགས་པའི་དངོས་པོ་འགའ་ཞིག་ཀྱང་འབུལ་བར་མཛད་པ་དང༌། གཞན་ཡང་ཞྭ་ལུ་རི་ཕུག་ཏུ་རྩོད་པའི་དུས་ཀྱི་ཀུན་མཁྱེན་བུ་སྟོན་གཉིས་པ་རྡོ་རྗེ་འཆང་རིན་ཆེན་བློ་གསལ་བསྟན་སྐྱོང་དཔལ་བཟང་པོའི་དྲུང་དུའང་དངོས་རྫས་འགའ་ཞིག་ཕུལ་བ་དང༌། ཞྭ་ལུ་ཆོས་སྡེ་དང༌། སྣར་ཐང༌། སྲད་རྒྱུད་པ། སྲད་དགོན་ཁྲ་སོགས་ཉེ་སྐོར་གྱི་དགོན་ཁག་རྣམས་སུའང་མང་ཇའི་བསྙེན་བཀུར་སྩལ་བ་སོགས་མདོར་ན་རྨད་དུ་བྱུང་བའི་མཆོད་པའི་སྤྲིན་ཕུང་འཛད་པ་མེད་པར་སྤྲོས་པའི་ཚུལ་འདི་ལྟ་བུ་ནི། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་རྣམ་པར་ཐར་པ་ཁོ་ན་དང་མཚུངས་པར་འགྱུར་གྱི། དེ་ལས་གཞན་པའི་སོ་སོ་སྐྱེ་བོ་གཏོང་ཕོད་ཆེ་བར་རློམ་པ་མང་པོ་ཕྱོགས་གཅིག་ཏུ་བསྡོམས་ཀྱང་གང་གི་ཆ་ཤས་རེ་ཡང་བསྐྲུན་ཏུ་ཡོད་པའི་རེ་བ་ནི་པདྨའི་རྩ་བ་ལྟར་ཤིན་ཏུ་ཕྲ་བའོ་ཞེས་དགེ་བའི་ཕྱོགས་ཀྱི་ཟླ་འོད་གཞོན་ནུས་ཡིད་ཀྱི་ཀུ་མུ་དཱ་ཡོངས་སུ་ཁ་ཕྱེས་པའི་སྐྱེས་བུ་གཟུ་བོར་གནས་པ་རྣམས་ཀྱིས་མགྲིན་གཅིག་ཏུ་སྙན་ངག་དམ་པའི་གླུ་བཞིན་དུ་ལེན་པར་བྱེད་དོ། །དེ་ནས་བཟུང་སྟེ་ཨེ་ཝྃ་རང་དུ་བཞུགས་ནས་གཙོ་བོར་ཐུགས་དམ་ཁོ་ན་ལ་གཞོལ་བར་མཛད་ཅིང༌། བཀའ་ཆོས་ཀྱི་རིམ་པའང་དགུར་གྲངས་རེ་གསུམ་དུ་ཕེབས་པ་ལྕགས་མོ་ཕག་གི་ལོར་སྡེ་དགེ་བླ་ཆེན་བྱམས་པ་ཀུན་དགའ་འཇམ་དཔལ་ཕན་བདེའི་སྙིང་པོ་དཔོན་འཁོར་རྣམས་ཨེ་ཝྃ་དུ་ཕེབས་ཏེ། དེས་གསོལ་བ་བཏབ་པའི་ངོར་གྲུབ་ཆེན་བི་རཱུ་པའི་ཐུགས་བཅུད་གངས་ཅན་བསྟན་པའི་མངའ་བདག་རྗེ་བཙུན་ས་